“Minister Silvania waar een wil is, is er een weg” Ban pa bai, ku e adaptashon di penshon di behes Penshonadonan no por warda mas ku un aña mas riba un simpel adaptashon

“Minister Silvania waar een wil is, is er een weg”

Ban pa bai, ku e adaptashon di penshon di behes

Penshonadonan no por warda mas ku un aña mas riba un simpel adaptashon

 

Tin algun dia kaba si no ta siman ku tin un diskushon polítiko ta bai bini tokante di adaptashon di penshon di behes (AOV). Tin un tiramentu di falta riba otro  ta bai bini  di ken a keda sin hasié i ken finalmente si mester hasié. Mi no ta bai drenta den aspektonan tékniko finansiero pasombra mi no ta kere ku esei ta yuda nos pueblo ku nada.  Un realidat ta, ku preisnan di prinsinpalmente komestible ta subiendo di un forma bárbaro, anto esaki ta afektá tur suidadano. Si nos bai konforme loke lei ta prekribí, e suma di penshon di behes mester a wòrdu adaptá for di despues di covid na momento ku tabatin kresementu ekonómiko.  Esei te ainda no a tuma luga pa varios motibu tékniko gubernamental. Awor Minister ban legumai tur diskushon di pasado i aktuá awo komo un mandatario inteligente kreativo i ku kurason pa pueblo. 

Desafortunadamente tin un grupo grandi di penshonado den nos komunidat ku ta e entrada di penshon di behes ta nan úniko fuente di entrada. Tin penshonado ku ta for di e entrada aki nan ta yuda mantené otro miembronan di famia manera nietu, subrina etc. etc.  Nos a tende Minister di finansas bisa ku  lo mester bai kana un trayekto largu di mas ku 1 aña pa por yega na e adaptashon di penshon di behes na un forma responsabel. Promé ku yega asina leu ta un komishon lo mester bai studia e materia aki pa wak kon lo por hasié. Nos di PNP ta e últimonan ku lo rekomendá ningun mandatario pa goberná di un forma iresponsabel. Sinembargo si ta papia di oumento di e suma di penshon di behes pa e alkansá un montante manera e ta na Aruba of San Martin, ainda nos por komprondé e asuntu di un komishon. Pero Mirando ku ta trata di un simpel adaptashon, e ora ey si, no. Minister ta bisa ku mester hasi esaki konforme konseho di IMF. E ponensia aki sigur nos di PNP no ta kompartí. IMF ta un órgano monetario internashonal ku ta wak sifra so i no ta wak e hende, i nunka lo bini ku un konseho ku ta tene kuenta ku nos realidat soshal di país. 

 

Sr. Minister di finansas tin varios desishon ku bo a tuma resientemente durante di kampaña kaminda mester a saka sumanan kuantioso i no a konsultá ku ningun komishon ni IMF.  Nos ta asumí ku a tuma e desishonnan aki pasombra nan lo a aliviá un parti di nos pueblo su doló.   Bashí premi por ehempel etc etc… Aworaki nos ta papia di un terser parti di nos pueblo ku ta pendiente di un simpel adaptashon ku nan tin derecho riba dje, i ke benté mas lew ku 1 aña. Anto e adaptashon aki  no ta un suma  asina grandi. Komishon instalá i  IMF por duna nan konseho, pero ta e   mandatario  ta responsabel i su desishon semper ta unu polítiko, pasombra pueblo no ta vota ni pa IMF ni pa ningun komishon. Awor normalmente nos lo mester a dirigí nos mes na Minister di asuntunan soshal pa ku e asuntu aki, pero ya komo ku ta minister di finansas ta atendé mayoria asuntu di e gabinete aktual, nos ta haña nos ta hasi nos suplika na dje. 

 

Lokual nos kier a rekomendá minister hasi ta, pidi e komishon konsehá kua ta e kaminda mas rapido i efisiente ku mester kana pa nos penshonadonan lo por haña nan adaptashon ku nan tin derecho riba dje mas rapido posibel. Minister, nos tur sa ku “waar een wil is, is er een weg”. Ban pa bai. Nos penshonadonan no por drenta niun establesimentu pidi deskuento di 25% riba kombestible  durante un aña pa warda e komishon kaba di studia e materia. Nos sa ku bo por, djis hasié pa kaba!

 

Dudley Lucia

Presidente Partido Nashonal di Pueblo