Di Ring pa un Legado – E Historia Tras di “The Golden Jab Award”

Di Ring pa un Legado – E Historia Tras di “The Golden Jab Award”

Marcelo “Cheo” Zimmerman

Marcelo Luciano “Cheo” Zimmerman a nase na 1964 na Kòrsou. Su pashon pa bokseo a kuminsá hopi tempu pasa ora e a uni ku Boca Boxing Club. Ku 14 aña di edad, e a subi den ring pa su promé pelea. Ku un deseo grandi pa sigi desaroya su mes, ela bai Venezuela ku 19 aña pa entrená na e prestigioso “Instituto Nacional de Boxeo Venezuela.”

Akinan su karera a krese rapidamente. Despues di 20 pelea amateur (ku 19 viktoria i 1 derrota), Cheo a pasa di bokseo amateur pa bokseo profeshonal. Durante 26 aña—di su 14 te su 40 aña—ela bringa na Kòrsou, Aruba, St. Maarten, Venezuela, Anguilla i Hulanda. Su rekord profeshonal tabata 24 viktoria i 6 derrota. El a bira kampion di Reino Hulandés, Antia Hulandes, Karibe, Kampion Interamerikano i kampion mundial UBC den klase super middleweight.

Pero e lucha di Cheo no a kaba den ring.

Na desèmber 2021, ela habri un kapitulo nobo den su bida di deporte ora e a habri Boca Boxing Club bek. Hunto ku su ruman Nel Zimmerman i Jair Antonia, nan a kuminsá duna entrenamentu gratis na mucha i hendenan hoben den nos komunidat. Su meta no tabata solamente forma kampion den deporte, sino forma hende su karakter i disiplina.

Pero algu a keda semper den su kabes: “e falta di oportunidat pa boksdónan hoben.”

Aña tras di aña, Cheo a mira kon hopi di e muchanan ku talento ta entrená ku hopi gana i kurashi , pero sin nifikashon internashonalmente. Nan no ta haña chens pa boks pafo di Korsou, pa sea representá Kòrsou su bandera o gana eksperensha internashonal. Nan ta traha basta duru, pero e mundu no ta mira nan.

Esaki a toka Cheo su kurason.

“Mi a mira hopi talento … pero sin oportunidat, talentonan ku a keda tapá,” Cheo ta bisa. “Nos mester krea algu. Un plataforma pa nan por subi riba dje, pa nan por krese den e mundo di bokseo.”

Asina e idea di Golden Jab Award a nase.

E no ta solamente un award. Sino un símbolo di speransa, dignidat i rekonosimentu. Un stage pa e boksdó hoben por bria— kontra boksadónan di Internashonal, Aruba, Boneiru, Surinam, Venezuela, Brasil, Colombia, Hulanda i hopi otro país mas.

E Golden Jab Award tin un mensahe kla: “Bo ta konta. Bo talento ta balioso. Bo soño merese di wordu mira i di bira realidat.”

Riba dos dia 5 i 7 di sèptèmber 2025 na PWFC Building pa 19.00or, lo tuma lugá e promé edishon internashonal di e torneo boksistiko ” The Golden Jab” na Kòrsou. Den e ring lo tin Aruba, Bonaire, Surinam, Venezuela, Colombia, Brazil i Hulanda, hopi boksdónan talentoso, mayoria di e klubnan lokal, inkluso e pupilonan di Cheo mes—kla pa lanta nan bos i lucha pa un mihó futuro.

The Golden Jab Award no ta un final.

Esaki ta djies e kuminsamentu.