Cuida bo salud durante dia di calor intenso: Recomendacionnan pa proteha bo bienestar
Cuida bo salud durante dia di calor intenso: Recomendacionnan pa proteha bo bienestar
ORANJESTAD, Aruba –031 di juli 2025: Den bista di e ola di calor cu ta afectando Aruba actualmente, Departamento di Salud Publico (DVG) ta haci yamado na tur residente y bishitante pa tuma medidanan preventivo pa proteha nan mes y nan salud.
Calor extremo por trece riesgo serio pa salud, especialmente pa e grupo vulnerabel manera mayornan di edad, mucha chikito, hende cu malesa cronico y esnan cu ta traha pafo. Calor por ocaciona cansancio, golpi di calor (heatstroke), deshidratacion y empeoracion di malesanan cronico existente.
Consehonan util pa protehe bo mes durante dianan di calor:
- Bebe hopi awa
- Mantene bo curpa hidrata: bebe awa regularmente, apesar cu bo no tin sed.
- Evita alcohol, coffie y refresco cu hopi sucu, nan por causa deshidratacion.
- Mantene bo mes fresco
- Keda paden durante e oranan di mas solo (11:00 AM – 3:00 PM).
- Usa ventilacion (ven) of airco si ta disponibel.
- Tuma douche friu pa baha temperatura di bo curpa.
- Bisti paña color cla y liviano
- Usa paña hancho, di color cla, y di tela liviano.
- Usa pechi of sombre
- Usa bril di solo ora bo ta sali pafo.
- Proteha bo cuero
- Usa sunblock (SPF 30 of mas halto) y ripiti e aplicacion cada dos ora.
- Tira bista riba hende vulnerabel
- Haci contacto regular cu mayornan di edad, bisiña y famia cu malesa.
- NUNCA laga mucha, hende of mascota den auto cera, ni pa un rato cortico.
- Limita esfuersonan fisico
- Evita haci trabounan fisico durante e ora di mas calor.
- Si ta necesario, tuma pausa frecuentemente den sombra y bebe awa constantemente.
- Evita deportenan pafo durante oranan di mas calor
Sintomanan di malestar relacional cu calor:
- Cansancio extremo pa motibo di calor: soda hopi, cuero ta cayente, mareo, stoma ta bira, dolor di cabez.
- Golpi di calor (Emergencia): temperature cu cuero halto, desorientacion, perdida di conocimiento, cuero seco sin sodo.
- Den caso di sospecha di golpe di calor, yama 911 mesora.
Keda informa
Sigui e boletinan di tempo y informacion oficial via canalnan di gobierno of Departamento di Salud Publico. Nos ta pidi na tur hende pa cuida nan mes y otro. Cu medidanan preventivo nos por preveni hopi problema y pasa e temporada di calor den manera sigur.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw
