Director di Santa Rosa sra. Nathalie Maduro y tambe  minister di Finansa, Asunto Economico y Sector Primario sr. Geoffrey Wever a ricibi e delegacion. Despues di un introduccion chikito a duna inicio na e recorido den Santa Rosa pa admira seccion y cultivonan cu e departamento mes ta produci. Durante e recorido na pia nan a haya un splicacion corto di kico ta e tarea-, responsabilidad-, proyecto- y manehonan di Santa Rosa riba e tereno di sector primario.

A admira e matanan di fruta y berdura cu tin planta y tambe haya un splicacion di e tipo di baca cu nos tin y nan rasa. Asina e recorrido a continua caminda a yega na e seccion caminda tin planea cu e Agri Innovation Park (AIP) lo mester bin. Sr. van Marum haya un presentacion corto di minister sr. Geoffrey Wever y sr. Erwin Greoneveld di kico lo bay bira e proyecto encuestion.

E recorido a continua despues pa e DC ALFA Food Forrest caminda tambe a haya un splicacion encorto di kico tabata e idea y pa ilustra otro sistema sostenibel cu nos ta studiando pa local ta su contribucion comercial. Pa culmina e paseo den Santa Rosa a yega na “Cunuco Chabelito” cu ta nos “Kinderboerderij” caminda varios di nos productornan local tabata anfitrion. Aki e Staatssecretaris sr. Eddie van Marum a bishita cada un di nos productornan local invita pa asina cera conoci cu nan y wak kico ta e productonan cu nan ta produci y ofrece na e pueblo di Aruba.

Asina a haya un splicacion cortico di cada productor presente:

• Rachelle Peterson – producor di varios tipo di paddestoel;
• Jair Britten di “Cunuco Calbas” –  productor di carni fresco;
• Brandon Maduro y Angelique Croeze di “Croeze Farm” – producor di variedad di berdura;
• Shirley Illidge – producor di varios licor;
• Pestana Ranch – producor di di webo fresco;
• Jake Arends di “Cunuco Fresh” – producor di lechuga fresco;
• Daniel Barros –  apicultor y ta produci honing y otro productonan;
• Charles Koolman – productor di pinda;
• Ivan Dijkhof di “Sunny Greens – producor di varios micro greens.

Culminando sr. van Marum su bishita a dirigi palabra na tur presente di ta masha contento y impresiona di kico tur ta wordo produci na Aruba den un clima no facil y ta masha contento di por a admira tur esakinan hunto na un ocasion asina special.

Departamento di Agricultura, Cria y Pesca/Santa Rosa  ta gradici VNO Aruba pa por a haci tur posibel pa Staatssecretaris sr. Eddie van Marum bishita nos departamento. Na minister Wever y tur productor local cu por tabata presente pa haci e dia uno formidabel pa nos bishitantenan.