KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Scol Preparatorio Santa Jacinta tambe ta parti di e plan di reforestacion di Aruba

Scol Preparatorio Santa Jacinta tambe ta parti di e plan di reforestacion di Aruba

ORANJESTAD – Prome Minister, señor Mike Eman, a haci un bishita na Scol Preparatorio Santa Jacinta na Dakota.

Durante e bishita, e a haya oportunidad pa conoce y valora e gran aporte cu e scol, ta duna pa sostené e plan di reforestacion di nos isla.

Durante e presentacion, juffrouw Emma Carrascal a comparti e plan y meta di e proyecto cu e scol tin. Den un area prepara specialmente pa e prome fase, lo planta mata di fruta y berdura.

Denter di e marco di un scol saludabel, a cuminsa e preparacion di e tereno, cu gran yudansa di boluntario y cu e apoyo firme di gobierno. Nan ta traha na un meta cu pronto lo bira realidad.

Prome Minister Eman a comparti algun palabra durante e bishita, destacando e importancia di scolnan, misanan y casnan como parti esencial di cada bario.

Durante Accion di Bario, Prome Minister a bishitá dos scol: Scol Preparatorio Santa Jacinta y Pius X School. E a uza e oportunidad pa motiva e mucha pa cuida y mantene nan hardin. Na Scol Pius X, e a duna apoyo na inicio di e hardin di scol, cu pronto lo ta igual di bunita como esun di Santa Jacinta.

E alumnonan di Scol Santa Jacinta a regala Prome Minister un mata cu vingerprint di hopi mucha. E mata aki lo haya su lugá den bestuurskantoor Cocolishi, simbolisando union y compromiso di tur alumno cu e plan di reforestacion di Aruba.

E scol ta un lugá caminda maestro y mayor ta traha hunto pa bienestar di tur alumno, den un ambiente familiar, sigur y stimula pa su desaroyo integral. E scol ta busca forma pa motiva e descubrimento di talento y pa forma persona cu humildad, norma y balor.

Scol Preparatorio Santa Jacinta a habri su porta riba 1 di januari 1960 como nascol di “Onze Lieve Vrouw van Fatima”, cu nos ta conoci awor como Fatima College. E scol tabatin 100 alumno bou di guia di Zuster Dorotea v/d Helm como cabesante.
Na maart 1960 a cuminsa construccion di kleuterschool cu a habri oficialmente dia 20 di april 1961, bou di nomber Jacinta Kleuterschool. E scol tabata consisti di 4 klas y 129 alumno, bou di guia di Zuster Walfrida Roovers.
Riba 20 di april 2021, scol a cambia su nomber pa Scol Preparatorio Santa Jacinta, na honor di Jacinta Marto cu a ser declara santo y cu ta patrona di scol. Santa Jacinta ta un scol catolico bou di Stichting Katholiek Onderwijs Aruba (SKOA).

E dedicacion y alegria di tur docente y alumno ta briya den e proyecto di plantacion di mata, cu ta un gran estimulo pa continua logra e meta di planta 100 mil mata rond Aruba.

Leave a Reply

This site uses Akismet to reduce spam. Learn how your comment data is processed.