Willemstad, 10 di sèptèmber 2025 – Den un periodo di solamente un siman, dòkternan di mucha na Curaçao Medical Center (CMC) a risibí tres kaso diferente di mucha ku a hera di hoga. E insidentenan a tuma lugá na laman i na pisina. Dòkternan di mucha ta enfatisá pa tur mucha sin diploma di landa bisti banchi di landa of “zwemvest” na tur momentu i pa nan ta bou di supervishon konstante ora nan ta den òf serka di awa. Nan ta urgi tur mayor/adulto pa semper mantené bista riba muchanan na tur momentu.

Insidente di kasi hoga por tin efekto serio i duradero riba muchanan, asta si nan sobrebibí. Sigun ekspertonan di CMC, e konsekuensianan aki por inkluí:

• Síntomanan Retardá: E mucha por parse manera ku e ta bon djis despues di e insidente, pero komplikashon por surgi algun ora òf dia despues.
• Hipoksia: Falta di oksígeno miéntras e tabata bou di awa por kousa daño na kurpa i e serebro, afektando abilidat kognitivo i e abilidat pa move of kontrolá su kurpa.
• Neumonia: Inhalashon di awa por kousa infekshon den pulmon, ku por resultá den difikultat pa hala rosea.
• Impakto Sikológiko: Mucha por sintié hanshá, keda ku miedu di awa, òf keda ku trastorno pos-traumátiko (PTSD) despues di e insidente.
• Problemanan di Desaroyo despues: Kaso severo por resultá den daño neurológiko permanente, ku por afektá siñamentu i komportashon.

E puntonan aki a wòrdu diskutí den detaye den e Podcast “Puntra un Eksperto” ku Dr. Duque di 24 di yüli 2025 riba Facebook di Curaçao Medical Center, unda e ta enfatisá e posibel konsekuensianan aki. Por fabor tuma tempu pa wak esaki i kompartí e informashon ku sernan kerí.