MOU entre banko sentral di Sint Maarten i di Saint Martin CBCS ta formalisá kolaborashon ku IEDOM
MOU entre banko sentral di Sint Maarten i di Saint Martin
CBCS ta formalisá kolaborashon ku IEDOM
WILLEMSTAD/PHILIPSBURG — Resientemente, Centrale Bank van Curaçao en Sint Maarten (CBCS) i su instituto homólogo na Saint Martin, esta, Institut d’Émission des Départements d’Outre-Mer (IEDOM) di Banque de France, a formalisá nan kooperashon mediante un Memorandum of Understanding (MoU) históriko. Algu úniko di e isla di Sint Maarten ta e frontera kompletamente habrí ku tin entre e dos partinan di e isla. Ekonomia di Sint Maarten i di Saint Martin ta fuertemente interkonektá i e MoU akí ta un muestra di e kompromiso ku ámbos instituto ta sinti pa por yega na komprondé mihó ki efekto e frontera habrí tin riba e dos ekonomianan.
Danki na e kolaborashon akí, ámbos instituto lo por optené dato na un manera mas rápido i eksakto. Asina, CBCS lo bin komprondé mihó kon e dos partinan di e isla ta influensiá otro, por ehèmpel, pa loke ta trata turismo i e kantidat di kamber ku tin disponibel. Komo resultado, CBCS lo por produsí análisis i proyekshon ekonómiko di mas kalidat. Di e manera ei, e lo por fortifiká su desishonnan tokante maneho monetario.
Ku bista pa futuro, e aliansa akí lo sirbi komo un fundeshi sólido pa mas investigashon ekonómiko riba vários tema ku ta relevante pa ámbos instituto, spesialmente riba tereno di turismo, ku ta asina importante na tur dos parti di e isla, pero tambe relashoná ku otro áreanan di trabou di un banko sentral.
Presidente di CBCS, Richard Doornbosch, a firma e akuerdo huntu ku presidente di IEDOM, Ivan Odannat na ofisina di CBCS na Sint Maarten, durante un seremonia den presensia di personal di ámbos instituto.
Philipsburg, 12 di sèptèmber 2025
CENTRALE BANK VAN CURAÇAO EN SINT MAARTEN
