Tabata tres dia di conferencia cu a consisti di cinco sesion. E conferencia a hiba e nomber di “It All Starts With You”.

Ta trata aki di un conferencia inspirativo cu a hiba e meta pa cultiva interes, compromiso y pasion cerca studiantenan den e ramo di hospitalidad y otro areanan cu ta e bos di e presente y futuro di nos turismo. A.T.A. kier sigui inverti den profesionalnan turistico y particularmente nos futuro generacionnan.

E conferencia di e dos ultimo edicionnan a enfoca riba studiantenan di E.P.B., E.P.I. y algun studiante di Universidad di Aruba, pero pa e edicion di e aña aki, Aruba Tourism Authority a opta pa enfoca riba e studiantenan di E.P.B. y E.P.I. pero tambe riba e studiantenan di MAVO cu ainda no a scoge si nan lo continua nan estudio na HAVO of EPI. Un total di cuater scol a participa den e conferencia. Nan ta Colegio E.P.I., E.P.B. Oranjestad, Filomena College (MAVO) y La Salle College (MAVO). E aña aki tambe tabatin un un sesion special cu mayornan.

Debi na e exito cu e conferencia tabatin aña pasa, a scoge pa invita Trent Shelton un bes mas. E ta un orador internacional inspirativo, cu un bes mas a conecta cu e hobennan durante tres mainta di conferencia. A traves di su propio proposito, Trent a guia e audiencia na con pa yega na nan proposito, nan poder y nan paz interno. Su mision di bida ta pa conecta e hende cu e miho version di nan mes, comunicando directamente di su experiencia propio. Cu su plataforma global, Trent ta conecta cu su audiencia via diferente charla inspirativo, podcast, buki y audiobook, rednan social, cursonan di salud mental y maneho di bo mente pa menciona algun.

Trent Shelton a trece cu ne un hoben pa conecta cu e studiantenan. Ta trata di e motivational speaker, Marquis Hill, un hoben di 20 aña di edad cu tin un mision pa inspira y motiva mas bida cu e por. Durante e edicion aki Rodrick “Rocco” Franken tambe tabata tin e oportunidad pa conta con el a bira “From Dreamer to Doer”. Rocco ta cantante, un influencer y un brand ambassador pa varios compania grandi na Aruba, Bonaire yCuraçao. El a inicia su carera musical cu apenas 9 aña di edad y ta celebrando e aña aki su di 30 aña den farandula. Conoci pa su carisma y un actitud semper positivo pa logra den bida. Un persona cu a logra su soño di haci su hobby como cantante bira su trabou di tur dia.

Mester bisa cu den tur e sesion y na e scolnan, e publico presente a participa activamente y ser conmovi pa e contenido, di e guia y inspiracion cu e oradornan a comparti cu nan. Tur presenta a ricibi e mensahe cu tur cos ta cuminsa cu bo mes! Kere den bo soño, tuma accion y sa cu tur oportunidad ta posibel.