Den luna di sèptèmber: Promé edishon Nazario Martijn Championships

Den luna di sèptèmber:

Promé edishon Nazario Martijn Championships

WILLEMSTAD — Entre 18 i 21 di sèptèmber binidero, lo tuma lugá e promé edishon di Nazario Martijn Championships den Pisina Enith Brigitha, na Sentro Deportivo Kòrsou (SDK). E torneo aki ta organisá pa Typhoon Swim Club komo un homenage na Nazario Martijn, ku tabata fundadó i entrenadó di e ekipo. 

Invitashonnan a wòrdu mandá i preparashonnan ta den full swing. E kampionato ta un asina yamá ‘invitashonal’, pues lo tin partisipantenan di Korsou i banda di esaki, organisadónan ta spera ku landadonan for di entre otro: Aruba, Boneiru, Sint Maarten i demás paisnan den Karibe i Suramerika tambe lo inksribí. Di akuerdo ku Typhoon Swim Club, Nazario Martijn Championships lo bira un wikènt  yená di motivashon, team spirit  i un gran muestra di rèspèt i apresio pa Nazario Martijn ku a nifiká hopi pa e deporte di natashon na Kòrsóu. 

 

Nazario Bernardus Martijn a nase 2 di yüli 1958 na Kòrsou. Su amor pa natashon a kuminsá na 1973 ku ta e aña ku Buladó Swim Club e ser fundá. Nazario a kuminsa promé komo atleta den e ekipo i despues a sigui komo entrenado. Entre 1988 i 2008 Nazario a fungi komo head coach di Buladó i a kontribuí na desaroyo di varios landadó hoben ku después tabata hopi eksitoso durante kompetenshanan internashonal.

 

2008 tabata tempu pa un reto nobo i Nazario a funda Typhoon Swim Club, ku bou di su guia a bira un di e klubnan di mas taya di Kòrsóu. El a keda head coach di Typhoon te dia ku el a fayese na 2019. Durante e periodo aki, Typhoon a gana 6 kampeonato nashonal konsekutivo. Tambe Nazario a forma parti di e tim di entrenadó di selekshonnan nashonal ku a representá Antiyas Hulandes i Kòrsou na varios kampionato internashonal. Banda di tur esaki, Nazario a siña miles di mucha  landa na su skòl di natashon na Pier den bario di Marie Pampoen. Nazario tabata un di e instruktornan mas respetá na Kòrsou.

 

Na aña 2015, señor Martijn a risibí un kondekorashon real (Orde di Oranje-Nassau) pa su gran kontribushon na deporte. Na e mesun aña, Federashon Deporte i Olímpiko Kòrsou (FDOK), a nombra Nazario Coach di Aña i na mes momento Typhoon Swim Club a risibí título di Team di Aña. Na fin di 2019, a inkluí Nazario postumamente den Curaçao Sports Hall of Fame. Su yu Zariona Martijn a risibí e honòr na su nòmber. E organisashon di natashon regional CCCAN (Central American and Caribbean Amateur Swimming Confederation) tambe a rindi homenage na Nazario su aporte den deporte akuatiko.

 

E Nazario Martijn Championships no ta unikamente un kompetensia di natashon: E evento pa kual e intenshon ta pa tuma luga anualmente, tin tambe komo meta pa mantene e legado di Nazario Martijn  bibu. E torneo ta reflehá balornan ku Nazario tabata kere hopi den dje. Entre otro: disiplina, desaroyo personal, koperashon i oportunidat pa hobennan desaroyá.

Nazario Martijn Championships mester sirbi tambe komo un plataforma pa koperashon i interkambio entre paisnan den Karibe i suramerika pa asina fortalesé lasonan deportivo.

 

Klubnan ku ke partisipá na Nazario Martijn Championships mester inskribí promé ku 1 di sèptèmber 2025 via e-mail: go.typhoon.swimclub@gmail.com. Pa mas informashon por yama: 565-6175 of subi Facebook: Typhoon Swimclub