Promé Minister enkargá alabes ku sektor di Agrikultura, Medio Ambiente i Naturalesa a organisá un seshon di informashon speshal pa empleadonan di e sektor menshoná.
Awe 18 di sèptèmber 2025, Promé Minister enkargá alabes ku sektor di Agrikultura, Medio Ambiente i Naturalesa a organisá un seshon di informashon speshal pa empleadonan di e sektor menshoná. Durante e seshon aki Minister Pisas a duna di konosé su plannan pa e sektor funshona optimal, kaminda dunando un bon servisio na komunidat ta di sumo importansia. Na final a habri oportunidat pa empleadonan hasi remarke òf pregunta na Minister Pisas.
Pa logra e meta ariba menshoná, señora Lydia Vroegop di SOAB lo ta presente tur atardi na Ministerio di GMN entrante 29 di sèptèmber. Señora Vroegop lo tene un entrevista ku kada empleado individual pa haña un bista kla di e trabounan, eksperensianan, talentonan, posishon hurídiko i retonan ku e empleado sa topa den práktika.
Señora Vroegop lo hasi un “nulmeeting” pa pone na kla e situashon aktual di e personal, funshon i trabounan. E nulmeting aki ta un paso importante pa duna mas klaridat tokante e tareanan i responsabelidatnan den e sektor. E meta final ta pa yega na un organisashon strukturá ku ta mas kapás pa sirbi e komunidat i realisá objetivonan di maneho.
E empleadonan a komprondé e trayekto nobo aki i ta pará habrí pa duna nan aporte.