Kòrsou ta partisipá den proyekto piloto huntu ku paisnan di CARICOM pa prevení introdukshon di Fiebre Porcino Afrikano riba nos isla
Kòrsou ta partisipá den proyekto piloto huntu ku paisnan di CARICOM pa prevení introdukshon di Fiebre Porcino Afrikano riba nos isla
Willemstad- Resientemente Minister di GMN drs. Javier Silvania a duna inisio ofisial na un proyekto piloto pa prevení introdukshon di malesanan di animal riba nos isla kual a tuma lugá na Asuntunan Veterinario. Esaki relashoná ku malesanan di animal sumamente kontagioso presente den eksterior ku posiblemente por keda introdusí na Kòrsou. Ta trata aki en partikular di e malesa Peste Porcino Afrikano (PPA). PPA ta kousando dañonan inmenso na kriaderonan di porko na Oropa, Asia, Afrika i den nos region na Haiti i Republika Dominikana.
E proyekto piloto aki ta un paso importante den nos esfuerso kolektivo pa protehá salú di animal, sigurá futuro di agrikultornan i reforsá seguridad alimentisio na Kòrsou. PPA aktualmente ta un di e retonan mas grandi den sektor agríkola, no solamente den nos región, pero tambe na nivel mundial. Un brote por devastá e industria porsino i trese pèrdida ekonómiko grandi, inseguridat alimentisio i restrikshonnan komersial. Pero via kolaborashon, investigashon i innovashon, nos por traha riba solushonnan práktiko, no solamente pa kriadónan di porko, sino tambe pa e medio di bida di komunidat agríkola i pa stabilidat di seguridat alimentisio.
Pa e motibu ei, ta importante pa reforsá kapasidat di preparashon i reakshon na PPA den paisnan di CARICOM mediante implementashon di e proyekto piloto aki. Ku e inisiativa aki, nos ta demostrá nos kompromiso pa desaroyá solushonnan sientífiko, pa mehorá sistema di monitoreo i pa pone na disposishon di agrikultornan hèrmèntnan útil i prátiko. E kolaborashon aki, huntu ku un sistema proaktivo di trata PPA, lo hiba nos region na un estrategia efiektivo. Riba potrèt por mira ekspertonan for di Colombia, Costa Rica, Chili i Guyana ku ta na Kòrsou pa inisio di e proyekto piloto aki.
