Komunidat ta keda demostrá interes i sostené proyekto Bienestar di Animal 

 

 

 

Komunidat ta keda demostrá interes i sostené proyekto Bienestar di Animal 

Willemstad – Durante e fin di siman ku a pasa un bes mas tabatin un tremendo ban  topa den kuadro di Proyekto Bienestar di Animal. E biaha aki e ban topa a tuma lugá na  na Capital Dome na Hato kaminda públiko a akudí i demostrá gran interes pa e bunita  proyekto aki. Durante e tremendo ban topa aki un total di 90 kachó a keda di chip i a  traha 28 sita pa sterilisashon i ainda tin 12 sita pendiente. 

E próksimo ban topa ta tuma lugá dia 1 di novèmber benidero na Sentro Deportivo  Kòrsou na Brievengat i lo ta e último pa e aña aki. Ku e edishon spesial aki lo sera  tambe òktober kual ta luna di Dia di Animal. Durante e edishon spesial aki lo tin  sorpresanan i oportunidat pa públiko gana vários premio. 

Basá riba e sifranan di tur e ban topanan ku a tuma lugá for di aña pasá, por konkluí ku  mas i mas nos komunidat ta komprondé importansia di ta un doño di animal  responsabel. Chip i sterilisá kachó no solamente ta yuda ku identifikashon di e animal  den kaso esaki pèrdè, sino tambe ta kontribuí na redukshon di e problemátika di  animalnan bandoná riba nos isla. 

Minister di GMN señor Javier Silvania a introdusí e bunita proyekto aki pa konsientisá nos komunidat, pero tambe trata na kreá un sentido di responsabilidat serka kada doño  di animal. Ku e akshon di chip i sterilisashon, informashon na públiko i aktividatnan pa  komunidat, e organisashon ta traha pa un futuro mihó pa animalnan domestiko. E gran  akohida di kada aktividat di Proyekto Bienstar di Animal ta demonstrá kada bes, ku  huntu nos por hasi e diferensha pa animalnan riba nos isla.