Kòrsou logra posishon Tier 2 den TIP-rapport 2025 di Departamentu di Estado Merikano

 

---

 

Willemstad – Kòrsou a logra posishon Tier 2, segun e TIP-rapport 2025 (Trafficking in Persons) di Departamentu di Estado di Merka. Esaki ta un logro importante den e esfuersonan kontinuo pa kombatí trafikashon di hende, i ta reflehá e trabou di Ministerio di Hustisia i PATH (Prevenshon di Abusu i Trafikashon di Hende). Na un tempu relativamente kòrtiku, Kòrsou a logra un avanse signifikante: den aña 2022 nos tabata na Tier 3, den aña 2024 na Tier 2 Watchlist, i awor den 2025 nos a subi pa Tier 2.

E kambio di posishon den e lista aki ta resultado di e esfuersonan kontinuo kontra trafikashon di hende. Den e último añanan, Gobièrnu di Kòrsou a amplia e servisio pa víktima pa garantisá protekshon oportuno, kuido i akseso na rekurso esensial. Na mes momentu a atendé ku kampañanan di outreach sosial pa yuda oumentá konsientisashon bou di nos komunidat i fortalesé e responsabilidat kolektivo pa prevení eksplotashon di hende. Kòrsou a amplia tambe disposishon di sentronan di “opvang”, pa asina víktima por haña akseso na un ambiente sigur i di sosten.

Ministerio di Hustisia ta ekspresá su gratitut tambe na Konsulado Merikano na Kòrsou pa e kolaborashon balioso i sosten kontinuo den e lucha kontra trata di hende. E partner akí tabata tin un ròl fundamental den mehoramentu di atenshon i kuido pa víktima, pero tambe a yuda pa fortalesé e kuadro legal.

Miéntras Kòrsou ta sigui riba e kaminda, e mishon i bista di PATH ta keda sentral den nos strategia nashonal. Mishon di PATH ta koordiná i inisiá akshon komun i partisipashon sosial pa eliminá trata, trafikashon i smòkelmentu di hende. E bista ta pa krea un Kòrsou hustu i igual, kaminda kada persona por desaroyá sin ta eksplotá. E posishon Tier 2 ta konfirmá di nobo e determinashon di Kòrsou pa siguí e lucha kontra trafikashon di hende i ta motivá nos isla pa logra Tier 1.