Ora di kùr vehíkulo: Bin riba e dia i ora di bo sita!

img-20170202-wa0020

Ora di kùr vehíkulo: Bin riba e dia i ora di bo sita!

Willemstad – Servisio pa Tráfiko i Transporte (UO-VV), ku ta e servisio responsabel pa kùrmentu di vehíkulonan motorisá, ta pidi tur doño di vehíkulo pa tene kuenta ku e fecha i orario di nan sita pa kùr nan vehíkulo. Orario di kùr mainta mester presentá mainta na e orario stipulá i orario di tramèrdia na e orario indiká. Aktualmente ta manda e sita outomátikamente pa doño di vehíkulo, ku tin impuesto paga válido, via di pòst. Esaki ta sosodé segun e adrès riba e karchi di kùr i na e adrès mester tin un buzon pa risibí pòst.

Loke Servisio pa Tráfiko i Transporte a tuma nota di dje ta ku hopi kliente no ta tene bon kuenta ku nan sita pa kùr. Esaki por trese bruashon na momentu ku un persona presentá pa kùr su vehíkulo. Pa e kliente por kùr e vehíkulo, e kliente mester tin un sita riba e dia indiká.

Riba e dia di e sita, e kliente mester presentá, segun e ora indiká den e karta, na e departamentu di kùr ku: 1) su vehíkulo, 2) karchi di kùr, 3) e papel di e sita di kùr (no ta obligatorio) i 4) e montante pa paga pa kùr. Preferibel paga via e sistema di ‘swipe’ i si no por, bini ku e montante eksakto. Kùr ta kosta Fl. 30,= pa tur vehíkulo. Si e karchi di kùr a kaduká, e montante ta bira Fl. 60,=. Si e kliente bin kùr, i e vehíkulo no pasa e kùr ku éksito (‘afgekuerd’), e kliente tin ku bai drecha e asuntunan na e vehíkulo i bin bek. Ora e kliente bin bek, e mester paga Fl. 10,= èkstra.

Si a kaso e karchi di kùr ta bai kaduká i no a risibí un karta na kas, por yama Bentana di Informashon na 0800-1515 òf 433-3123 pa un sita òf pasa personalmente na Saliña 127 Eurobuilding. Tambe por manda un e-mail na sita@gobiernu.cw. Esaki mester tuma lugá por lo ménos dos siman promé ku e karchi di kùr su fecha di vensementu. Pa tur otro pregunta ku no ta sita pa kùr por yama Servisio pa Tráfiko i Transporte na 839-2137.

Nos ke enfatisá ku e responsabilidat di kùr na tempu ta keda pa e kliente. Pa kualke pregunta, remarke i/òf sugerensia por e-mail nos na info.vvrp@gobiernu.cw.

This site uses Akismet to reduce spam. Learn how your comment data is processed.

%d bloggers like this: