KONGRESO DI CURAÇAO LITTLE LEAGUE 2025, UN ÉKSITO ROTUNDO!

Curaçao Little League ta orguyoso di anunsiá ku Kongreso 2025 pa Dirigentenan, Coachnan i Managernan pa e sinku liganan di Curaçao Little League, esta Liga Pariba, Pabou, Willemstad, Soriada Juliana i Aminta Sprockel Little League, ku a tuma lugá resientemente a resultá un éksito rotundo.

Durante di e kongreso aki a logra atendé vários punto di interes i a kompartí ideanan i eksperensia i prepará pa e temporada nobo di beisbòl i sòftbòl.

Eldrion Regina, un persona ku a forma parti di e ekipo ku a sali Kampion Mundial di Baseball Little League divishon Senior League na aña 2002, komo hungadó, tabata e orado prinsipal. Eldrion aktualmente ta inspirá hende pa bira mihó hende persona, Eldrion a tene un presentashon sumamente inspirativo pa yuda kambia Focus i pensa i aktua di un forma diferente. Tabatin presentashon di Jeffrey Martina riba Historia di Little League, Urny Florán a elaborá riba, Desaroyo di Little League Internashonal, Curaçao Little League, e la atendé e programashon kompletu di aña 2026, tambe a presentá Método pa rekluta Umpire i Training pa Coach i Umpire. Tabatin tayernan dinámiko i diskushonnan habrí, partisipantenan a eksplorá tópikonan klave pa logra e Meta di e Kongreso ku tabata pa Fortifiká kapasidat di liderato i coaching den tur 5 liga; Kompartí desaroyo, kambionan den coaching i maneho di boluntario; Fortifiká tur manager i coachnan ku konosementu di organisashon internashonal di Little League i organisashon lokal di Curaçao Little League i tambe Stimulá kolaborashon entre liganan i prepará pa temporada 2026.

Di parti di Curaçao Little League, masha danki na tur dirigente coach, manager, umpire, presidente di liga i voluntarionan ku a yuda prepará i ku a forma parti di e kongreso aki.

Tambe danki na nos spònsernan RBC, Curacao Tourist Board, Kenley Jansen i Ministerio di Enseñansa, Sensia, Kultura i Deporte pa nan sosten kontinuo.

Huntu nos ta sigui trahando riba e Next Level di Curaçao Little League, duna kada mucha e oportunidat pa hunga, siña i krese pa medio di beisbòl i sòftbòl.