Èks agente polisial kondená pa insidente ku violensia bispu di aña nobo na Saba
Èks agente polisial kondená pa insidente ku violensia bispu di aña nobo na Saba
Riba 31 di yüli 2025, Korte di Promé Instansia na Boneiru, Saba, i Sint Eustatius a kondená e èks agente polisial G. M. pa menasa i perhurio. Durante di kambio di aña e agente di KPCN, ku entretantu a pèrdè su trabou, tabata stashoná temporalmente na Saba i tabata na un bar/restorant lokal den su tempu liber. Einan M. a keda enbolbí den un disturbio, a saka su arma di kandela reglamentario i a dirigí esaki riba diferente persona.
E insidente a kousa un konmoshon konsiderabel riba Saba e tempu ei. Reshèrshi di Reino, bou di direkshon di Ministerio Públiko BES, a hasi un investigashon profundo riba e suseso violento aki, pa despues fiskal disidí di persiguí agente polisial M.
Den su sentensia, hues a dikta ku M. no tabata tin pèrmit pa usa su arma di kandela reglamentario di e manera aki e anochi en kuestion i a hasi su mes kulpabel na menasa. Hues a dikta tambe ku M. despues deliberadamente a eksagerá, skonde i kambia echo i sirkunstansianan den su prosès ferbal.
Hues a kondená M. na kuater luna kondishonal di prizòn, ku un periodo di prueba di dos aña. Ademas komo kastigu adishonal a imponé un prohibishon profeshonal na M. ku ta prohibié di traha komo polis pa 5 aña.
M. tin dos siman pa apelá e sentensia aki.
