KRIOYO FILM FESTIVAL 2025 KU META PA PROMOVÉ NOS KULTURA, IDIOMA I HISTORIA

Ku varios pelikula nobo i algun den sekshon di “Nostalgia””

KRIOYO FILM FESTIVAL 2025 KU META

PA PROMOVÉ NOS KULTURA, IDIOMA I HISTORIA

 

WILLEMSTAD – Tur kos ta kla pa djaluna dia 27 di Oktober2025, Kòrsou konosé su di dos edishon di Krioyo Film Festival, un evento kaminda ta promové nos kultura, nos idioma i nos historia.

Djaweps dia 16 di Òktober, Direktiva di Krioyo Film Foundation den presensia di  Komisario di Pelikula di Kòrsou, Sra. Eloise van Wickeren a tene un konferensha di prensa, kaminda a elaborá riba e importansia di pelíkula na papiamentu.

Presidente di Krioyo Film Foundation Sr. Giovanni Atalita a bisa ku Krioyo Film Festival ta un manifestashon di nos mes, di nos kultura, nos idioma, nos bida i nos historia, pero e ta un momentu den tempu, kaminda duna oportunidat pa produktornan di pelíkula por haña un Plataforma pa presentá nan obra..

Sr. Atalita a mustra ku e aña aki, nan ta pone un enfasis klaro: Tur pelíkula den e festival aki tin e mes un balor.

 

“E no ta simplemente entretenimiento — e ta identidat. Kada historia, kada karakter, kada paisahe ku ta aparesé riba e pantaya, ta reflehá nos alma krioyo”, asina Sr. Atalita a duna di konosé, indikando ku nan no ta kere ku un otro lo konta nos historia mihó ku nos mes.

Segun Sr. Atalita, nos ta un pueblo chikí, pero ku un spiritu grandi. Nos kultura no mester ta importá — nos tin aki, den nos palabra, den nos ritmo, den nos koló, den nos alma. Krioyo Film Festival 2025 ta un selebrashon di esaki. Un selebrashon di orguyo, di pashon, i di kreatividat.

Laga nos sigui demonstrá ku e Krioyo Film Festival tei pa keda, paso e ta un Festival ku ta krese tur aña poko poko.

Un danki na e siguiente partnernan ku a duna un man: Ofisina di Komisario di Pelikula na Korosu, Vigilante i Kontentu, Crown Automotives, Flow, Infocus, CPost, Banko Sentral di Korsou i St. Maarten, Bon Bini Supermarket, Ministerio di OWCS, Caribbean Cinemas, Ofisina di Abogado Murray, Cursoft, Curacao International Airport, Regulatory Authority of Curacao, All Signs,Aiuto, Tele Curacao Multi Media, Royal Rentals, Orco Bank i Sambil, The One and Only

CHENS PA WAK TUR PELÍKULA

Krioyo Film Festival ta duna e oportunidat pa 1 persona gana dos entrada pa wak tur pelíkula. Úniko kos ku bo mester hasi ta bai riba e red social di Krioyo Film Festival, sea Facebook, Instagram o Tik Tok,  like, share i comment pa kiko bo stima pelíkula na Papiamentu. Un ganadó lo risibi komo premio dos entrada pa por wak tur e pelikulanan.

Tesorero i Direktor Tekniko di Krioyo Film Festival Sr. Orlando Martina a bai den e parti tékniko, kaminda ela bisa ku tin a e momentunan aki tin 18 pelíkula ku a drenta di kual mayoria ta di 2025. Pues pelíkulanan nobo nobo ku lo estrená e aña aki. 

Komisario di Pelíkula na Kòrsou Sra.Eloise van Wickeren di su banda a mustra riba e importansia di e industria di pelíkula na Papiamentu i kuantu esfuerso Gobièrnu di Kòrsou ta hasi den esaki. 

Den dianan ku ta sigui aki lo bai tin mas informashon di e pelíkulanan ku lo bai pasa den Krioyo Film Festival, na Caribbean Cinemas den Sambil.