𝐀𝐩𝐞𝐫𝐭𝐮𝐫𝐚 𝐞𝐝𝐢𝐟𝐢𝐬𝐢𝐨 𝐧𝐨𝐛𝐨 𝐏𝐫𝐨𝐣𝐞𝐜𝐭 𝐓𝐞𝐚𝐦 𝐓𝐨𝐞𝐳𝐢𝐜𝐡𝐭 𝐞𝐧 𝐇𝐚𝐧𝐝𝐡𝐚𝐯𝐢𝐧𝐠 (𝐏𝐓𝐇)

Projectteam Toezicht en Handhaving (PTH) ta inougurá edifisio nobo

Willemstad – Riba djamars 28 di òktober, Projectteam Toezicht en Handhaving (PTH) di VVRP a inougurá nan edifisio nobo situá na Parera riba tereno di Servisio pa Obra Públiko. E edifisio aki ta kompletamente ekipá komo un joya moderno. E ta konsisti di entre otro tres ofisina, un sala pa inspektornan, un sala di reunion moderno, i tur mobilario di sosten nesesario. Di e forma aki, PTH ta aun mas mihó prepará pa por ehersé nan trabou kontra ilegalidat.

Minister Charles Cooper a hiba palabra durante di e inougurashon i a indiká ku e ministerio a invertí den PTH tantu na empleado, fondonan, vehíkulo, i awor un edifisio ku tur mobilario nobo i moderno. Esaki ta muestra sigur di e dedikashon di ministerio pa pone nos pais bèk na òrdú, sigur pa loke ta trata okupashon ilegal di terenonan di gobièrnu, i konstrukshonnan ilegal.

PTH ta outorisá pa kontrolá i aktuá kontra di esakinan di forma severo kaminda ta nesesario. Banda di esaki, PTH ta kontrolá tambe ku entre otro bòrchi di propaganda, permit pa teras, pèrmit di kobamentu kantu di kaminda, i mas. Esaki den kuadro di nos leinan manera entre otro Bouw en Woningverording (BWV), Eilandelijke Ontwikkelingsplan (EOP), Eilandsverordening Ruimtelijke. Ontwikkelingsplanning Curaçao (EROC), i Landsverordening Openbare Orde (LOO) .

Minister Charles Cooper huntu ku staf i personal di VVRP ta felisitá PTH ku e logro grandi aki.