Minister di Hustisia i GMN a hasi un bishita di trabou na plantashon i krio di bestia na SDKK
Minister di Hustisia i GMN a hasi un bishita di trabou na plantashon i krio di bestia na SDKK
Willemstad: Djamars 11 di novèmber 2025, Minister di Hustisia mr.Shalten Hato i Minister presidènt enkargá ku salubridat, medio ambiente i naturalesa sr. Gilmar Pisas a hasi un bishita di trabou huntu ku e kolaboradornan di Soltuna i AVB na e trayekto di plantashon i krio di bestia na Sentro di Detenshon i Korekshon Kòrsou..
E meta di e bishita aki tabata, pa wak e desaroyo riba e tereno di plantashon na prizòn. Esaki despues ku aña pasa a firma un akuerdo di koperashon entre Ministerio di Hustisia i GMN, ku lo ta kolaborashon riba desaroyo di agrario i tambe di krio di bestia. Tambe den kuadro di e trayekto aki a pone fondonan nesesario pa durante e 5 aña benidero por hasi plantashon den vários forma i téknika moderno i tambe lo inisiá ku krio di diferente bestia e.o: Kabritu, Karné i tambe Galiña. Mas aleu e trayekto aki lo yuda tambe ku e kushina di SDKK, esta lo ku keda planta lo wòrdu usa pa kushina pa klientenan den prizòn.
Na okashon aki tur presente por a tuma nota di e desaroyo positivo ku tin aktualmente pa ku e trayekto ariba menshoná i a risibí un rekorido kompleto riba e tereno ku a bin terminá den un “ Food Tasting ‘’ di diferente platonan ku a ser prepará pa nos kòkinan di SDKK.
Tambe durante e enkuentro aki, tabata tei presente un delegashon for di Sürnam, ku a bini pa 2 siman, den kuadro di un programa di interkambio di konosementu ( twinning) riba e área di plantashon.
E seremonia a terminá den un ambiente sosial, kaminda ku tur presente a saboriá e diferente platonan ku a keda prepará, ku produktonan di nos plantashon i tambe disfrutá di un dushi juice di orégano.
