Minister Pisas ta reuní ku piskadónan di FAD pa deliberá tokante faktibilidat di posibel seramentu di merkado di importashon di Buní

Minister Pisas ta reuní ku piskadónan di FAD pa deliberá tokante faktibilidat di posibel seramentu di merkado di importashon di Buní

Willemstad – Minister di Asuntunan General enkargá alabes ku Agrikultura, Medio Ambiente i Naturalesa señor Gilmar Pisas a yama piskadónan di FAD pa un reunion importante. Durante e reunion aki ku ta tuma lugá na haf di piskadó di Caracasbaai, ta bai deliberá ku piskadónan di FAD tokante e piskamentu di Buní relashoná ku e merkado di importashon awor ku a instalá e FAD’s.

FAD ta “Fish Aggregating Devices”, kual ta un struktura di bui i kabuya den laman ku ta atraé piská i na e FAD’s nan aki hopi biaha tin piská entre otro hopi Buní. For di e periodo ku Minister Pisas a inisiá e proyekto aki te ku aworaki a instalá 12 FAD i e meta ta pa instalá total 25 FAD te na final di e proyekto. Ku instalashon di e FAD’s nan aki a oumentá e piskamentu di Buní di tal manera ku kisas no ta nesesario pa sigui importá Buní di e forma ku e ta sosodé aktualmente.

E reunion importante aki ku piskadónan di FAD ta tuma lugá djaweps awor dia 13 di novèmber pa 6’ or di atardi na haf di piskadó di Caracasbaai. Lo deliberá konhuntamente ku e piskadónan di FAD i interkambiá di ideanan pa analisá e faktibilidat pa sera e merkado di importashon di Buní. Lo tei presente Minister Gilmar Pisas, Minister Roderick Middelhof i representantenan di Ministerio di GMN i MEO.