Parlamentario Monte ku preguntanan skèrpi tokante Sefba Invershon sin resultado no ta progreso
Parlamentario Monte ku preguntanan skèrpi tokante Sefba Invershon sin resultado no ta progreso
WILLEMSTAD – Parlamentario Ishahier Monte di frakshon Movementu Futuro Kòrsou (MFK) den un karta pa minister di Desaroyo Sosial, Labor i Bienestar, señora Charetti America-Francisca, ta hasi 11 pregunta tokante funshonamentu, resultadonan i uso di fondo públiko dor di SEFBA.
SEFBA tin un tarea importante den nos komunidat. E organisashon tin komo meta, entre otro, pa fortalesé sentronan di bario, promové desaroyo sosial, edukashonal i kultural, i kontribuí na mehorashon di kalidat di bida den barionan di Kòrsou. Pa realisá e metanan aki, SEFBA ta risibí sosten finansiero di Gobièrnu.
Segun sr. Monte, hustamente pa motibu di e importante tarea sosial i e uso di fondo públiko, ta nesesario pa Gobièrnu i Parlamento tin un bista kla riba kon SEFBA ta funshoná, kua ta e resultadonan i ku si e organisashon tin e kapasidat nesesario pa kumpli efektivamente ku su mandato.
Ora un organisashon ta risibí fondo públiko, pueblo tin derechi di sa no solamente kon e sèn ta wòrdu gastá, pero tambe di sa kua ta e resultadonan i balor agregá e invershon ta generá pa nos komunidat”, asina sr. Monte ta bisa.
Den su preguntanan, sr. Monte ta pidi minister pa indiká kon Gobièrnu ta evaluá e funshonamentu di SEFBA, kua ta e indikadónan di prestashon ku ta wòrdu utilisá i kua ta e resultadonan konkreto ku e organisashon a logra den barionan durante e último tres aña. Tambe sr. Monte ke sa si tur puestonan den Direktiva i Hunta di Komisario di Sefba ta debidamente okupá i, si tin vakatura, kon esaki ta influensiá e kontinuidat i funshonamentu di e organisashon.
Un otro punto importante ta e maneho di fondo públiko. Sr. Monte ta pidi pa duna un bista di e supsidionan ku SEFBA a risibí durante e último sinku añanan, si e organisashon a kumpli ku su obligashonnan di rendishon di kuenta i di ki manera Gobièrnu ta ehersé kontrol riba e uso korekto i efektivo di e fondonan. E parlamentario ta interesá tambe den e benefisio sosial, ekonómiko i, kaminda aplikabel, finansiero ku Kòrsou ta risibí komo resultado di e invershon den SEFBA.
Sr. Monte ta enfatisá ku e propósito di su preguntanan no ta simplemente pa señalá eventual defisiensianan, sino prinsipalmente pa determiná kon SEFBA por wòrdu fortalesé pa e por kumpli mihó ku su importante tarea den komunidat. P’esei e ta pidi Gobièrnu pa indiká si tin intenshon di hasi un evaluashon integral di e organisashon i, kaminda ta nesesario, tuma medidanan pa fortalesé su kapasidat profeshonal, finansiero i organisatorio.
Si SEFBA tin un papel importante den desaroyo di nos barionan, nos interes mester ta pa e organisashon ta fuerte, profeshonal i efektivo. Bon gobernashon, transparensia, sosten finansiero i resultado mester kana sam sam ku otro, asina sr. Monte ta mustra.
Finalmente, sr. Monte ta pidi Gobièrnu pa indiká si e resultadonan ku SEFBA ta logra ta den proporshon ku e sosten finansiero ku e organisashon ta risibí. Segun e parlamentario, kada invershon ku ta wòrdu hasi ku fondo públiko, kaminda posibel, mester tradusí su mes den resultado konkreto, medibel i balor agregá pa pueblo di Kòrsou. Pasobra invershon sin resultado no ta progreso.
