Mama Wak! Ta nos mester realisá kon orguyoso nos mester ta di nos Yunan i di nos pais.

Mama Wak! Ta nos mester realisá kon orguyoso nos mester ta di nos Yunan i di nos pais.

 

Kòrsou ta un pueblo SUPER talentoso. Esei a wòrdu demostrá un biaha mas.

Paso ku “nan” ke mira òf nò, selekshon di Futbol di Kòrsou TA nos yunan, ku nan a nase aki òf nò. Komo Isla chikí, tur aña di nobo nos ta manda un kantidat di nos yunan talentoso eksterior pa nan desaroyá nan mes, spesialmente Hulanda.

Huntu ku nan, un grupo di yu di tera trahadó i luchadó, ta bai Hulanda en buska di un miho futuro pa nan mes i nan famia.

Nan ta Yu di Kòrsou? Sigur ku si! Paso si nos isla chiki por a brinda nan mesun oportunidat ku Hulanda i Oropa, hopi di nan lo NO a bai. Sinembargo e realidat ta diferente. Niun Isla chiki manera nos, no por kompetí i brinda mesun oportunidat di desaroyo manera paisnan grandi i riku.

Pues komo pais, nos realidat ta ku nos ta eksportá nos yunan talentoso i trahadó, pa nan desaroyá na un otro pais kaminda nan tin mas oportunidat, ku e speransa ku nan ta bolbe bèk. Sea ta Hulanda (estudio, futbòl, Atletismo, músika), òf por ehèmpel Merka (Baseball, Softball, Atletismo, músika i estudio).

Pa añanan nos a mira e talento deportivo di nos yunan bria riba e plataformanan mundial di mas haltu, manera den MLB, Atletismo Mundial, Little League Baseball, weganan Olímpiko, ekiponan di futbòl Hulandes, Ingles, Aleman, Champions League, Mundial di Fùtbol, sea pa nan ekiponan profeshonal, pa Kòrsou òf pa Hulanda/Reino.

Dor di trabòu duru i vishon di FFK pa algun aña kaba, Kòrsou TA duna un plataforma pa nos yunan di tera futbolista hunga riba plataforma internashonal, bria i keda mirá. Antes, solamente selekshon di Hulanta tabata un opshon p’esei. Ku selekshon Hulandes ta un potensia mundial den futbòl, ta sigur. Pero resientemente i awor mas ku nunka, selekshon di Kòrsou TA un opshon.

Anto si nos no “djis pensa ku nos a logra” paso nos lo partisipá na Mundial 2026, sino mira esaki komo un paso grandi mas den nos desaroyo futbolistiko, selekshon di Kòrsou lo bira aún mas un opshon pa nos yunan aki i den eksterior.

Paso Kòrsou su nòmber indudablemente a krese den futbòl den Karibe i Amerika i a bira visibel rònt mundu komo un isla ku talento den futbòl tambe. Nos a gana Haïti, Jamaica i Trinidad & Tobago i a bira un di e pioneronan den futbol den Sentro Amerika i Karibe.

Si nos invertí den e impulso aki, Kòrsou lo bira un Isla ku sa kon desaroyá su talento deportivo den futbòl tambe. Meskos ku Baseball kaminda ya kaba nos ta un fenomeno mundial. Paso nos TIN talento den futbòl tambe. Nos por bira un “Isla pa tene kuenta ku n’e” internashonalmente.

 

Paso ta esaki ta Kòrsou !!

 

“Mama Wak unda nos a yega”, ta un ekspreshon perfekto di e orguyo aki. Pero mas importante aún, ta pa nos mira unda mas nos por bai komo pais!

 

Kòrsou, nos mester ta orguyoso di nos yunan! Nan ta habri porta di mundu pa nos. Ta na nos pa sigui kana e kaminda huntu ku nan.

Quincy Girigorie

Lider di frakshon di PAR