Landhuis Parera di OW lo wòrdu tratá kontra pèst

Willemstad — Servisio pa Obra Públiko (OW) ta informá ku entre djaweps 11 te ku djabièrnè 13 di desèmber 2025, e landhuis lo wòrdu kubrí kompletamente pa un tratamentu intensivo kontra pèst.

Durante di esaki, lo no por tuma lugá ningun tipo di trabou den landhuis, i e edifisio lo keda será pa tur hende ku no ta di kompania HepCo, ku ta e entidat kontratá pa hasi e tratamentu spesial. Pues OW ta será pa kliente riba e dianan menshoná.

Ademas, den un distansia di 5 meter for di landhuis tampoko no por tin moveshon ni entrada, te na momentu ku HepCo mes ta deklará ku e área ta sigur pa bolbe drenta i traha.

Segun indikashon di HepCo, si tur proseso ta bai segun plan, riba djaluna 15 di desèmber, e landhuis lo ta aksesibel atrobe pa empleadonan i públiko.

OW ta pidi komprenshon di tur hende i ta indiká ku esaki ta un medida nesesario pa garantisá un ambiente sigur, salú i konfortabel pa tur hende ku ta usa su fasilidatnan.