Siklo di fleksibilisashon monetario ta sigui  CBCS ta mantené maneho prudente  

 

 

PB2025-056  

Siklo di fleksibilisashon monetario ta sigui

CBCS ta mantené maneho prudente

 

 

WILLEMSTAD/PHILIPSBURG — Dia 12 di desèmber 2025, Centrale Bank van Curaçao en Sint  Maarten (CBCS) a tuma e desishon di fleksibilisá s su maneho monetario. Banko a redusí su  tasa di interes ofisial (‘beleningsrente’) ku 25 punto básiko te na 4,25%. Esaki ta e di dos  redukshon pa e aña akí. E desishon akí ta sigui e redukshon di tasa di Reserva Federal  Estadounidense na desèmber 2025 i ta respaldá pa un posishon di divisa fuerte di e union  monetario. Nos reserva ofisial bruto a oumentá supstansialmente e aña akí i nos kobertura  promedio di importashon a subi te na 4,8 luna. No opstante, oumento di tenshon geopolítiko,  spesialmente den nos region, por hiba na oumento di preis di importashon, suak imágen di  Karibe komo un destinashon turístiko safe, i afektá entrada di kapital den nos union monetario.  En bista di e insertidumbre ku ta reina, CBCS lo vigilá e desaroyonan ekonómiko doméstiko i  internashonal djaserka i ahustá su maneho si ta nesesario.  

  

E kalkulashonnan mas resien di CBCS ta mustra ku posishon ekonómiko di nos union monetario  en relashon ku eksterior a mehorá den 2025. E défisit riba kuenta koriente di balansa di pago a  baha, di 16,4% di PIB den 2024 te na 11,4% den 2025. E mehoransa akí ta danki na un oumento  den eksportashon, prinsipalmente debí na un oumento den entrada di divisa for di turismo i servisio  di transporte, i un bahada den importashon total. Loke a impulsá e redukshon den kosto total di  importashon ta prinsipalmente un bahada den importashon di produkto petrolero. Esaki ta kuadra  ku e bahada den preis promedio di krudo den 2025. 

Reserva ofisial bruto tambe a oumentá. Te ku 14 di novèmber 2025, ta trata aki di un oumento di  Cg 274,4 mion. Pa fin di aña, ta premirá ku e reservanan lo subi ku Cg 230,9 mion ya ku, segun  pronóstiko, finansiamentu eksterno i transferensia di kapital for di eksterior lo ta mas haltu ku e  défisit riba kuenta koriente. Komo resultado, ta proyektá un oumento den e kobertura promedio  di importashon, di 4,5 luna na 2024 pa 4,8 luna na 2025, loke ta kómodamente riba e norma di 3  luna.  

Den 2026, segun proyekshon, e défisit riba kuenta koriente lo sigui baha te na 10,3% di PIB i ta  premirá ku reserva ofisial bruto lo sigui subi, aunke ku un poko ménos forsa, ku Cg 181,5 mion. Na  su turno, kobertura promedio di importashon lo sigui oumentá te na 4,9 luna.  

Aunke e perspektiva akí ta positivo, ainda e faktornan ku por afektá e pronóstiko ta supstansial i  prinsipalmente negativo. Aunke ta spera ku na 2026, konsistente ku e proyekshon di inflashon na  e partnernan di komèrsio mas importante di e unión monetario, inflashon na Kòrsou ta baha te  2,1% i ku inflashon na Sint Maarten ta keda stabíl na 1,8%, desaroyonan global por tòg resultá den  inflashon mas haltu. Si e tenshonnan entre Estádos Unídos i Venezuela sigui eskalá, esei por krea  insertidumbre relashoná ku siguridat di transporte marítimo, opstakulisá komèrsio i hiba na 

oumento den kosto di transporte i seguro marítimo. Ademas, esei lo por suak reputashon di Karibe  komo un destinashon turístiko safe, afektando turismo i e nivel di konfiansa di invershonista. E  konfliktonan na Medio Oriente i e guera na Ukrania tambe ta sigui menasá e kadena mundial di  suministro i preis di produkto básiko. E desaroyonan akí por okashoná un oumento den preis di  importashon, afektá fluho di kapital i pone preshon riba e union monetario su posishon eksterno.  

Fuera di esei, ainda tin insertidumbre relashoná ku perspektiva di komèrsio mundial. Medida di  gobièrnu i desaroyo geopolítiko por kambia rumbo di maneho komersial fásilmente. E  insertidumbre akí ta presente ainda, maske na 2025 e tarifanan di importashon a okashoná ménos  shòk ku a spera. Loke a yuda limitá e shòk ta ku e importadónan a adelantá nan pedidonan i Estádos  Unídos a sera sierto akuerdo resientemente ku nan partnernan prinsipal. No opstante,  insertidumbre tokante implementashon di e akuerdonan ei i e prosesonan den korte ku ta  andando na Estádos Unídos relashoná ku e tarifanan ta sigui lanta duda tokante e perspektiva akí.  Tur esaki ta oumentá e posibilidat di un oumento den kosto di importashon i di mas traba den  kadena di suministro. Pa Kòrsou i Sint Maarten, e desaroyonan akí por hiba na mas inflashon, si  importashon bira mas kostoso i invershon for di estranheria baha debí na e oumento di  insertidumbre. 

Ademas, tin faktornan di riesgo lokal manera desasternan natural okashoná dor di kambio di klima,  retraso den invershon públiko ku ta limitá kresementu, i defisiensianan riba tereno di AML/CFT ku  ku por perturbá aktividat finansiero. Banda di esaki, envehesimentu di poblashon i oumento den  gastunan di kuido na Kòrsou i Sint Maarten por pone preshon riba presupuesto di gobièrnu,  debilitando finansa públiko i ariesgando sostenibilidat di esaki. 

Mirando tur esaki, CBCS a adaptá su maneho monetario pa e kana pareu ku e siklo di  fleksibilisashon di Fed. Dia 10 di desèmber 2025, Fed a redusí su tasa federal te na 3,50–3,75% mirando ku aktividat ekonómiko na Estádos Unídos ta pèrdiendo forsa i e kondishonnan di merkado laboral ta bayendo atras, aunke inflashon a kuminsá subi un poko. En bista di e desishon  di Fed, CBCS a disidí di redusí su tasa di interes ofisial, esta, e tasa ku CBCS ta ofresé e bankonan  komersial den kaso ku nan tin falta di likides, te na 4,25%. Ku esaki CBCS ta keda 50 punto basiko  riba e tasa federal di Fed. E desishon aki ta keda respaldá pa e union monetario su posishon sólido di divisa i un evaluashon minusioso di e desaroyonan internashonal, mientras ku ta mantené  maneho monetario prudente. 

Ademas, CBCS lo mantené e porsentahe di reserva obligatorio na 18,50%. Tambe, CBCS lo sigui  ofresé sertifikado di depósito na tasa atraktivo na e emishonnan semanal, pa tene mas likides di e  bankonan riba merkado doméstiko i asina yuda mantené un posishon sólido di divisa. 

Willemstad, 15 di desèmber 2025 

CENTRALE BANK VAN CURAÇAO EN SINT MAARTEN