Un bunita seremonia di entrega di Pan di Amor na SDKK

WILLEMSTAD – Ya ta un tradishon ku señor Norwin Martina i su tim, ta hasi entrega di Pan Dushi di Pasku, esta Pan di Amor, na klientenan di Prizòn den temporada di fin di aña.

E aña aki tabata di 24 aña ku e pan di amor a keda entrega na prizòn. P’esei pa ku e okashon aki, e pan di amor a keda presentá i entrega dor di 2 mucha riba un garoshi ku kabai na entradá di prizòn.

Mas aleu señor Norwin Martina a hasi entrega ofisial di e promé pan di amor na señora Sueneisa Morales komo kolaborador di Minister di Husitisia i señor Anthonny Hasselmeijer komo direktor suplente di prizòn.

E aña aki durante un seremonia spiritual, e lema pa 2026 a keda presentá na tur presente ku ta ‘Ban para Firme, Fuerte, Duru i Kla den e Bèrdat di Dios’

Gerensia di prizòn ta gradisí señor Norwin Martina i su tim pa e bunita gesto duna na klientenan di SDKK.