Aksidente na Kaya Korona

Djadumingu 11 di yanüari, alrededor di 7:15 or di anochi, ‘meldkamer’ sentral a risibí notifikashon tokante un aksidente na Kaya Korona.

Na e sitio a resultá ku ta trata di un aksidente entre un motosaikel i un vehíkulo. Pa motibunan ainda deskonosí, shofùr di e motosaikel a dal kontra di e vehíkulo. A konsekuensia di e impakto, tantu e shofùr di e motosaikel komo e pasahero ku ta un mucha a resultá heridá. A transportá ámbos víktima pa hòspital den un vehíkulo partikular promé ku outoridatnan a yega na e sitio.

Personal di ambulans a presentá na e sitio i a duna asistensia na shofùr di e vehíkulo. No mester a transport’e pa hòspital.

Departamentu di Tráfiko di KPCN ta enkargá ku e investigashon na e kousa di e aksidente.