Maneho adapta pa deshasi di sushi gratis na Selikor na vigor entrante 1 yanuari 2026.
Maneho adapta pa deshasi di sushi gratis na Selikor na vigor entrante 1 yanuari 2026.
For di sèptèmber 2024 ta vigente na Kòrsou e maneho ku abitantenan por deshasí di shushi grátis na Landfill i na e stashon di transbordo di Selikor.
Pa garantisá un maneho di shushi duradero i pa protehá medio ambiente i salubridat públiko, e maneho aki a wòrdu adaptá for di 1 di yanüari 2026.
Alkanse di e maneho adaptá
Por deshasí di shushi di un manera grátis solamente si e shushi ta produsí lokalmente. Basá riba su orígen i karakter, shushi ta wòrdu dividí den e siguiente kuater kategorianan:
Kategoria 1: shushi di kas
Shushi ku ta bin for di kasnan, kompanianan i institushonnan ku, segun su naturalesa i komposishon, ta komparabel ku shushi di kas i ku ta wòrdu rekohé via e servisio regular di Selikor.
E shushi aki por wòrdu entregá grátis na Landfill i na e stashon di transbordo di Selikor.
Kategoria 2: shushi di kompania
Tur shushi ku no ta keda konsiderá shushi di kas, shushi gròf, shushi kímiko, shushi spesial, shushi di kaya òf eventonan, shushi prosedente di sanashon, karkacha di outo òf shushi di industria.
E shushi aki por wòrdu entregá grátis na Landfill i na e stashon di transbordo di Selikor. E intenshon ta pa sigui hasi esaki, pero ku kondishon ku e shushi aki mester wòrdu entregá separá, por ehèmpel manera: shushi di konstrukshon i demolishon, diabas, asfalt, shushi bèrdè, tayer di outo, glas, shushi gròf, karkacha di outo i metal.
Kategoria 3: shushi di industria
Shushi industrial, esta shushi ku ta bin for di prosesonan di produkshon i transformashon di industria.
Entrante 1 di 2026, no por deshasí di e shushi aki grátis mas.
Pa e tipo di shushi aki mester paga un montante na Selikor.
Kategoria 4: shushi spesial
Shushi ku mester wòrdu kolektá i tratá separá pa motibunan di seguridat, medio ambiente, salú públiko òf legal.
Esaki ta inkluí entre otro, shushi médiko, di laboratorio, veterinario, infektá, kímiko, peligroso, asbèst, eléktriko i elektróniko, radioaktivo, bòter di gas i zeta di kushiná.
Pa e kategoria aki tambe no por deshasí di e shushi grátis.
Pa e tipo di shushi aki mester paga un montante na Selikor.
Kiko esaki ta nifiká pa bo
Pa kasnan di famia no tin kambio: shushi di kas por wòrdu deshasí grátis.
Den kaso di kompanianan, solamente shushi produsí lokalmente por wòrdu entregá grátis pa awor.
Den tur kaso kaminda deshasí di shushi ta grátis den 2026, gobièrnu lo kubrí e entrada ku Selikor ta pèrdè.
Mas lat den 2026 Selikor lo kuminsá kobra pa shushi ku no ta wòrdu entregá separá.
E fecha eksakto lo wòrdu komuniká despues.
Pa shushi di industria i shushi spesial, tarifanan ta sigui aplikabel.
Informashon i fasilidatnan
Pronto Gobièrnu huntu ku Selikor lo start un kampaña di informashon tokante separashon korekto di shushi i lo mehorá e fasilidatnan na Landfill i na stashon di transbordo pa hasi entrega separá di shushi.
Mas informashon
Pa pregunta tokante maneho òf entrega korekto di shushi, por tuma kontakto ku Selikor via number di telefòn 566 1635.
Huntu nos ta traha pa un Kòrsou limpi, salú i duradero!
