Promé Minister Pisas i Konsul General di República Dominicana ta reafirmá deseo pa intensifiká kolaborashon
Asuntunan General i Promé Minister
Promé Minister Pisas i Konsul General di República Dominicana ta reafirmá deseo pa intensifiká kolaborashon
Publiká riba 04 Febrüari 2026
WILLEMSTAD – Riba djamars, 3 di februari 2026, Promé Minister sr. Gilmar Pisas a risibí bishita di sr. Carlos Ramirez Filpo, Konsul General di República Dominicana i sr. Ronni Batista Espinal, Visekonsul di República Dominicana. Esaki tabata un bishita di kortesia kaminda sr. Ramirez Filpo a bini pa introdusí su mes komo Konsul General nobo di República Dominicana na Kòrsou i pa eksplorá área di interés komún.
Durante di e enkuentro, Promé Minister Pisas i sr. Ramirez Filpo a papia tokante sektornan di turismo, salubridat i agrikultura ku ambos ta mira komo oportunidat pa kooperá mas profundo. I ku tin e akuerdonan, manera e memorandum di komprondementu entre di Reino i República Dominicana, ku por fasiltá esaki. Promé Minister Pisas tambe a indiká ku Kòrsou lo tin interes pa finalisá un akuerdo di dòbel impuesto ku República Dominicana.
Promé Minister Pisas i sr. Ramirez Filpo a reafirmá nan deseo pa intensifiká kolaborashon entre Kòrsou i República Dominicana i pa sigui mantené un diálogo kontinuo na benefisio di Kòrsou.
