Pista di Atletismo na SDK

Remplaso di e Pista di Atletismo na SDK ta tuma lugá den 2026 

WILLEMSTAD – Minister enkargá ku Deporte, sr. Sithree van Heydoorn, a tuma nota di e preokupashon di komunidat i krítikanan riba kondishon di e pista di atletismo na Stadion Ergilio Hato na Sentro Deportivo Kòrsou (SDK). Minister ta konsiente di e defisiensianan di e pista.

Na kabamentu di desèmber a hiba un kombersashon preliminar ku Curaçaose Atletiek Bond (CAB), Fundashon Desaroyo Deportivo Kòrsou (FDDK) i Sektor di Kultura i Deporte di Gobièrnu. E kombersashon tabata pa por interkambiá riba aspektonan tékniko i desishonnan importante ku mester tuma pa por yega na un pista pa atletismo nobo na e Stadion.  Riba presupuesto di aña 2026 tin fondonan reservá pa por kubri e gastunan pa un pista nobo di atletismo. Por indiká ku ya kaba a kuminsá ku e preparashonnan nesesario pa e proyekto aki.

Pronto Ministerio di Enseñansa, Siensia, Kultura i Deporte (ESKD) ta anunsiá e fecha riba kua e trabounan pa kambia e pista ta inisiá.

—

Sr. Sithree van Heydoorn

Minister di Enseñansa, Siensia, Kultura & Deporte