PTH a tuma medidanan kontra trailer riba ruta di karnaval

Willemstad – Projectteam Toezicht en Handhaving (PTH) a tuma akshon riba djabièrnè 13 febrüari 2026 despues ku a konstatá un infrakshon di prekario riba Rooseveltweg.

Durante un kòntròl a resultá ku un stelashi/trailer koloká riba tereno KV-537, sekshon B, a surpasá medidanan pèrmití segun e pèrmit otorgá (nùmber 333). Segun e pèrmit, tabatin outorisashon pa un largura máksimo di 5 meter. Na momentu di kòntròl, a konstatá ku e stelashi/trailer tin un largura di 5,70 meter, ku ta nifiká ta superá e medidanan pèrmití, i di e límite di tereno asigná.

E persona ku a haña e pèrmit a wòrdú informá for di adelantá, tantu telefónikamente komo via e-mail, i a haña oportunidat pa korehí e situashon boluntariamente. Te ku awe, e persona konsèrní no a atendé ku e notifikashon.

Konforme lei vigente, a apliká ‘bestuursdwang’ i e stelashi/trailer a wòrdú kitá i e tereno a wòrdú limpiá. E gastunan relashoná ku e medidanan tumá lo wòrdú rekobrá for di e persona ku a haña e pèrmit.

PTH ta enfatisá ku ta hasi supervishon i kòntròl  den interes di órden públiko, seguridat i trato igual pa tur kliente ku tin pèrmit, spesialmente riba ruta di karnaval.