Selikor i KoRRRsou ta uni forsa pa trese resiklahe den karnaval 2026

Durante di marchanan di karnaval, un tim lo parti sakunan pa asina e
públiko por separá shushi miéntras nan ta disfrutá di karnaval.
E aña aki, Selikor i plataforma di sostenibilidat KoRRRsou a uni forsa pa lanta mas
konsientisashon den e komunidat lokal tokante redusí, reusá i resiklá durante di
karnaval.
Manera tur aña, Selikor ta plania ku hopi dedikashon pa karnaval, preparando su
ekipo pa sigurá ku prinsipalmente e ruta di karnaval i besindario ta keda limpi
despues di e periodo festivo aki. E aña aki, sin embargo, Selikor ta agregá un
dimenshon adishonal na su mensahe konosí “Tene Kòrsou Limpi”, dor di stimulá e
públiko pa redusí, reusá i resiklá miéntras nan ta disfrutá di karnaval.
Pa sostené e inisiativa aki, Selikor ta kolaborá ku KoRRRsou, un plataforma online
ku un guia kompleto di desperdisio, diseñá pa yuda habitantenan di Kòrsou deshasí
di nan desperdisio na un manera mas sostenibel. E plataforma ta ofresé
konsehonan práktiko tokante redusí, reusá i resiklá, i un lista di “RRRole Models”,
ku ta individuonan i organisashonnan ku ta tuma pasonan konkreto den direkshon
di sostenibilidat den nan bida diario i den nan operashonnan.
Konsientisashon i edukashon ku enfoke riba hóbennan
E meta di e kampaña di e aña aki ta pa konsientisá i eduká e públiko tokante kon
kada paso chikí por kontribuí na un gran diferensia, espesialmente ora ta trata di
tene nos isla limpi i separá shushi durante marchanan di karnaval.
Un di e figuranan prinsipal den e kampaña aki ta Grunchi, e maskota Kliko di
Selikor, ku ta hunga un ròl importante den kampañanan di konsientisashon dirigí
riba mucha i hóben. Pa promé biaha e aña aki, e Premio Grunchi, un premio otorgá
na e hóben mas konsiente tokante limpiesa i sostenibilidat, a wòrdu entregá
durante Festival di Tumba hubenil. Ganador di e aña aki tabata Kaydee Albertus,
kende tambe ta forma parti di e kampaña, huntu ku 2 otro artista hóben lokal
Tyziano i Jada.

Den e mensahenan di e kampaña, ta invitá e públiko pa bai ku saku òf kaha
karnaval. I asina separá nan shushi general for di nan desperdisio resiklá, manera
bòter di plèstik, bleki di aluminio i karton. E públiko karnavalista mester separá e
shushi korektamente, pa asina evitá kontaminashon di e shushi ku por resiklá for di
e shushi general manera kuminda òf bibida.
Resiklahe durante di e marchanan
Durante e marchanan di karnaval, Selikor i e ekipo di KoRRRsou lo traha huntu ku
Firgos, kende lo proveé saku transparente pa e públiko por usa pa resiklahe, i saku
bèrdè spesialmente diseñá pa resiklahe pa e bar i trailernan ku ta partisipá den e
marchanan. Na final di marcha, Selikor lo rekohé tur bòter di plèstik, bleki di
aluminio i karton ku a wòrdu separá den saku i kaha, usando su garoshinan
portabel.
E materialnan aki lo wòrdu distribuí entre resikladónan lokal, pa asina e shushi por
haña un bida nobo i lo no kaba den lèntfèl.
Ta invitá públiko pa tene nan wowonan habrí pa spòt e garoshinan hel, blou i bèrdè
na final di marcha i tene nan shushi separá kla pa kolektá.
Mas informashon
Pa mas informashon i pa wak tur e videonan di e kampaña, bishitá
http://www.koRRRsou.com.