Minister Charles Cooper, Curaçao Ports Authority.: A tuma lugá e seremonia ofisial di kuminsamentu di e proyekto di riolering na Skalo.

Minister Charles Cooper, Curaçao Ports Authority.

Willemstad, 2 di mart 2026 – A tuma lugá e seremonia ofisial di kuminsamentu
di e proyekto di riolering na Skalo.
Ku esaki ta kuminsá un inisiativa infrastruktural
importante ku tin komo meta mehorá kalidat di awa na Waaigat i den sentro di siudat.
Na e seremonia tabatin presente Minister di Tráfiko, Transporte i Planifikashon
Urbano, señor Charles Cooper i hefe di Obras Publiko sr. Wendel Bonifasio, huntu ku representantenan di Curaçao Ports Authority (CPA) direktor sr Himberto De Castro i sr. Zwetse i otro partnernan di e proyekto.
E projekto aki ta forma un paso importante den fortalesementu di infrastruktura
esensial den distrito di Skalo. Ora e proyekto ta kompletá, awa di riol for di Skalo lo
no wòrdu bahá mas den Waaigat, sino lo wòrdu desviá pa un planta di purifikashon
di awa di riol.
Esaki lo resultá den un mehorashon struktural di kalidat di awa i
kontribuí na un medio ambiente mas limpi i duradero.
Minister Cooper a enfatisá importansia di sigui invertí den infrastruktura i a deklará:
“E proyekto aki ta marka un mihó paso den fortalesementu di infrastruktura urbano di
Kòrsou. Dor di modernisá e sistema di riolering na Skalo, nos ta tuma paso konkreto
pa mehorá kalidat di awa na Waaigat i protehá salú ambiental di nos sentro di siudat
riba término largu.”
E proyekto lo wòrdu ehekutá den diferente fase i ta sperá pa dura aproksimadamente
seis luna. Durante e trabounan, sierto kamindanan lo wòrdu será temporalmente.
Curaçao Ports Authority ta sigui komprometí ku desaroyo duradero di haf i área
urbano ku ta kontribuí na resistensia i desaroyo sostenibel di nos komunidat marítimo
i urbano.
Mas informashon tokante progreso di e proyekto lo wòrdu kompartí durante
ehekushon.