Minister Middelhof di bishita na Zona Liber di Colón na Panama

Riba e lei nobo di Zona Liber ku pronto lo wòrdu introdusí, Minister Dr. Roderick Middelhof a hasi un bishita di trabou na Zona Liber di Colón na Panama. E bishita akí a tuma lugá huntu ku Parlamentario David Seferina i Sandy Losiabaar, nan ta forma parti di e Komishon Ekonómiko di Parlamento. E parlamentarionan a wòrdu invitá dor di Minister Middelhof pa partisipá na e bishita di trabou aki. E inisiativa aki a forma parti di nos esfuersonan pa studia práktikanan internashonal i pa mira kon otro paisnan ta organisá nan zonanan ekonómiko pa stimulá komèrsio, invershon i kresementu ekonómiko.

Durante e estadia na Panama, Minister Middelhof i su koleganan Parlamentario a haña oportunidat pa topa ku un komersiante di Kòrsou ku ta establesé i operando na Panama. Nos a tene un di polílogo konstruktivo riba nan eksperiensia den un merkado internashonal, e retonan ku nan ta enfrentá i tambe e benefisionan di operá den un zona liber ku un struktura logístiko fuerte. E kombinashon di fásilidatnan logístiko, proseso atministrativo simplifiká i un klima di negoshi kompetitivo ta hunga un ròl importante den e éksito di e Zona Liber di Colón na Panama.

E bishita akí a duna nos un bista mas amplio riba kon zonanan ekonómiko spesial por funshoná komo motor di desaroyo ekonómiko di un pais. E eksperensia di Panama ta mustra kon un struktura moderno, kla i transparente por atraé invershon internashonal, stimulá komèrsio i krea oportunidat di trabou.

Pa Kòrsou, e desaroyo akí ta di gran importansia. Pa hopi aña nos E-Zone a enfrentá diferente reto, manera regulashonnan internashonal ku a kambia, e pèrdida di e merkado Venezolano, proseso burokrátiko i kostonan relativamente haltu. Apesar di esaki, investigashon ta mustra ku un modernisashon basá riba “best practices internashonal”, Kòrsou tin oportunidat real pa revitalisá e sektor aki.

Den esei, Gobiernu di Kòrsou, den kolaborashon ku Tijdelijke Werkorganisatie (TWO), Ministerio di Desaroyo Ekonómiko (MEO) i Ministerio di Finansia, ta trahando riba un trayekto pa transformá e E-Zone eksistente pa bira “Special Economic Zones” (SEZ’s) moderno. E inisiativa akí ta forma parti di e Landspakket i tin komo meta pa modernisá, revitalisá i hasi e zonanan mas kompetitivo.

Durante Minister Middelhof i su koleganan Parlamentario su bishita na Panama, nan a mira ku nan propio wowonan kon un zona liber bon organisá por kontribuí signifikativamente na desaroyo ekonómiko di un pais. E konosementu i eksperensia ku nan a risibí durante e bishita di trabou akí sigur lo yuda forma un lei di “Special Economic Zones” ku ta adaptá na e realidat di Kòrsou.

E ambishon di Minister Middelhof ta kla: fortifiká nos zona liber, atraé mas invershon, krea trabou di kalidat pa nos pueblo i konstruí un ekonomia mas resiliente, kreativo i sostenibel pa futuro di Kòrsou.