Korps Politie Aruba CUERPO POLICIAL ARUBA SATISFECHO CU POR A BRINDA SEGURIDAD PA S.M. REY WILLEM-ALEXANDER SIN NIUN INCIDENTE

Santa Cruz, ARUBA: Cuerpo Policial Aruba tabata den preparacion algun tempo caba pa yegada di S.M. REY WILLEM-ALEXANDER. Tabata tin basta preparacion tanto interno, logistica, maneho, seguridad tambe introduccion di tecnologia avansa pa e cobertura di seguridad policial maximo pa S.M. REY WILLEM-ALEXANDER.

Na momento cu S.M. REY WILLEM-ALEXANDER a toca suela di Pais Aruba, KPA tabata bon prepara y equipa cu visibilidad tur caminda pa e seguridad.

Ariba nos dia nacional di 18 maart, tur personal tanto agentenan policial y personal administrativo tabata riba pia for di oranan di mainta trempan te cu anochi laat.

Bou guia di un grupo special y profesional di polis dirigi pa Comisario Adrick Croes, tabata coordinando y vigilando e seguridad maximo tur momento pa S.M. REY WILLEM-ALEXANDER. Tanto practico, informacion y uzando tecnologia avansa e grupo aki tabata tin un bista amplio di loke tabata pasando riba Aruba y tambe tur paso cu tabata tuma lugar.

Riba tera, lama y den aire nos tabata tin diferente unidad cu tabata brinda e servicio di seguridad pa S.M. REY WILLEM-ALEXANDER y pa nos comunidad. Un coordinacion estricto, pisa pero bon planea cu tur colega policial envolvi, nos por ta orguyoso cu desde momento S.M. WILLEM-ALEXANDER a toca suela di Aruba te na momento cu ela bandona Aruba no tabata tin niun incidente pa cu e seguridad nacional.

E esfuerso y profesionalismo di cada un colega a resalta y nos ta satisfecho pa bisa cu Cuerpo Policial Aruba por wak bek cu nos a brinda e maximo seguridad cu resultado exitoso! pa S.M. REY WILLEM-ALEXANDER, esaki no tabata posibel sin tur e personal di KPA.

Danki na nos comunidad pa e comprencion tambe e bon cooperacion cu nos tur por a disfruta un 18 di maart 2026 sanamente!