Kòrsou tambe ta konsientisa i aporta na Luna Blou

Luna Blou ta e luna di prevenshon kontra maltrato di mucha; “Tene bo man na bo kurpa”
Willemstad – Ministerio di Desaroyo Sosial, Labor i Bienestar (SOAW), pa medio di Sektor Famia i Hubentut, huntu ku Fundashon Bos di Hubentut, a uni forsa pa introdusí den luna di aprel e kampaña “Luna Blou”. Esaki ta un luna ku ta internashonalmente rekonosí pa krea konsientisashon i prevení maltrato di mucha.

Na Kòrsou, maltrato di mucha ta sosodé diariamente. Alarmante ta ku hopi di e kasonan aki ta keda skondí. Ministerio di SOAW ta traha inkansabelmente pa trese kambio den e situashon aki. Esaki en konekshon ku tratadonan internashonal tokante derechonan di mucha.  Kódigo di Protekshon ta un ehèmpel di inisiativanan ku ya ta andando pa señalá maltrato i pa sigurá ku e mucha ta haña e yudansa ku e mester. Durante 2025 a ekipá 83 supervisor di Kódigo pa yuda vigilá i tambe pa yuda profeshonalnan pa señalá abusu i maltrato.

Ku e introdukshon di e kampaña di Luna Blou, nos ta lansa un moveshon kaminda diferente aktividat lo kontribuí na konsientisashon di muchanan, mayornan, profeshonalnan i komunidat en general, pa nan por rekonosé i aktua ora tin sospecho di maltrato di mucha.

Durante di e periodo aki lo tin kuater aktividat prinsipal, ku lo informá i envolví nos komunidat di diferente manera:

Rueda di prensa:
E kampaña lo wòrdu lansá ofisialmente pa medio di un rueda di prensa di SOAW, Sektor Famia i Hubentut i Fundashon Bos di Hubentut. Tambe lo tin presentashon di un videoclip edukativo titulá “Tene bo man na bo kurpa”.

Videoclipnan di konsientisashon:
Durante un luna kompleto, ocho video lo wòrdu emití via tur medionan na Kòrsou pa yuda konsientisá kontra abusu di mucha.

Kampaña “Mito i realidat”:
Un serie di videonan ku ta desmentí mitonan ku ainda ta eksistí den nos komunidat, i ku ta ofresé informashon korekto. E videonan lo wòrdu publiká riba medionan sosial i tambe na The Movies.

Karavana pa skolnan (20 te ku 24 di aprel):
Un aktividat grandi kaminda, pa medio di músika i baile, lo bishitá 29 skol. Di e forma aki, no solamente via medionan sosial, sino tambe via kontakto dirèkt, muchanan i maestro(a)nan lo wòrdu alkansá. Dia 21 di aprel, Minister America-Francisca lo ta presente na Skol Sta. Clara pa e apertura ofisial di e aktividat.

Seshon pa profeshonalnan (22 di aprel):
Un enkuentro pa profeshonalnan ku ta traha ku mucha, ku e meta pa deliberá riba kasonan, kompartí eksperensia i formulá rekomendashonnan. E resultado lo wòrdu usá pa krea lasonan mas estrecho i mihó akuerdonan di trabou pa fortifiká maneho, kolaborashon i intervenshon den kasonan di maltrato di mucha.

Ministerio di Desaroyo Sosial, Labor i Bienestar, sektor Famia i Hubentut; ta hasi un yamada na  komunidat pa nan partisipá aktivamente, biba e mensahenan di e kampaña i kompartí e materialnan di konsientisashon. Huntu nos por hasi diferensia i protehá nos muchanan.