Presidente di Parlamento i Komishon di Asuntunan di Reino, Relashonnan Interparlamentario i Relashonnan Eksterior a risibí bishita di Sekretario di Estado pa Relashonnan den Reino, sr. Eric van der Burg, huntu ku su delegashon.

Motibu di su bishita di trabou tabata pa sera konosí ku Miembronan di e komishon i pa fortalesé lasonan di trabou. E bishita di trabou aki na Parlamento di Kòrsou ta forma parti di su promé biahe pa sera konosí ku e parti Karibense di Reino den su funshon nobo. Sr. Van der Burg ta bon konosí ku e islanan di Reino i den su funshon anterior komo miembro di Eerste Kamer e a forma parti di delegashon di IPKO. Durante sr. Van de Burg su bishita na e seis paisnan den Reino, diferente tema importante pa henter Reino a keda trata, manera bon gobernashon, seguridat, desaroyo ekonómiko i kolaborashon.

E enkuentro aki a kontribuí na un diálogo konstruktivo i pa fortalesé e relashonnan institushonal den Reino.