MINISTER HATO A REUNÍ KU SINDIKATO STRAF I HEFE DI REKURSO HUMANO KUSTWACHT

Teniendo kuenta ku e diferente problemanan rondó di posishon hurídiko di personal ku ta kai bou dje Ministerio di Hustisia, riba petishon di sindikato STRAF, Minister di Hustisia resientemente a reuní ku e sindikato.

Durante dicho enkuentro a trata kasonan individual ku pa basta tempu ta pendiente pa un desishon di parti di gobièrnu komo doño di trabou. Den e reunion aki a identifiká tur e kasonan individual ku ta pendiente. Banda di esaki Minister di Hustisia a hasi e kontaktonan nesesario i yega na palabrashonnan ku e departamentunan konserní den e diferente ministerionan ku ta duna konseho (riba tereno di personal i/o finansiero) pa asina – riba petishon di Minister di Hustisia – Gobièrnu por tuma un desishon. A palabra ku pa ougùstùs 2023 lo terminá ku tur e kasonan individual pendiente di Wardakosta.

Warda Kosta ta un partner importante den e kadena hudisial di Karibe. Wardakosta no ta dirigí solamente riba vigilansia di e fronteranan marítimo eksterior. E organisashon ta hunga un papel importante tambe den kombatimentu di kriminalidat ku ta pasa frontera i nan tin tarea riba tereno di vigilansia, ‘search and rescue’ i tambe kombatimentu di desaster. Pa por ehekutá e tareanan aki bon, durante e próksimo añanan di forma periódiko lo remplasá material.

Finalmente Minister Hato a interkambiá di pensamentu tambe ku e Hefe di Rekurso Humano di Wardakosta. Den e kombersashon aki Minister di Hustisia a haña un splikashon amplio di e struktura (nobo) den entre otro e departamentu di Rekurso Humano.