Minister Boekhoudt a partisipá na e di 21 Foro Anual di Unión Europeo i e Paísnan di Ultramar di Unión Europeo

Di 9 pa 14 di aprel 2026 a tuma lugá na hermana isla Aruba e di 21 seshon di e Foro Anual di Unión Europeo i e 13 Paísnan di Ultramar di Unión Europeo (LGO). A la bes a tuma lugá e Konferensha Ministerial di e Asoshashon di Paísnan di Ultramar (OCTA) i pa promé biaha unKonferensha di Invershon. Un delegashon di gobièrnu di Kòrsou lídera pa Minister di Salubridat, Medioambiente i Naturalesa, Sr. Tyron Boekhoudt, a partisipá na tantu e forokomo na e Konferensha Ministerial di OCTA.

Bou di e areglo di LGO vigente e foro anual ya menshoná ta obligatorio i ta forma e plataforma di mas haltu pa diálogo polítiko i tékniko entre Komishon Europeo, e tres paísnanmiembro di Unión Europeo ku LGO (Dinamarka, Fransia, Ulanda) i e 13 Paísnan di Ultramar, kendenan ta: Aruba, Boneiru, Kòrsou, Polinesia Fransés, Groenland, Nieuw-Caledonië, Saba, Saint Barthélemy, Saint Pierre-et-Miquelon, St. Eustatius, Sint Maarten, Terres Australes et Antarctique Françaises i Wallis et Futuna.

E aktual gobièrnu aña pasá a nombra Sr. Eduard Braam komo enviado speshal pa Bruselas kue tarea prinsipal di logra mas tantu proyekto i programa Europeo ku ta posibèl pa país Kòrsou. Sr. Braam tambe a forma parti di e delegashon di gobièrnu di Kòrsou i su partisipashon abrinda un bon oportunidat pa riba e nivel di mas haltu den e relashon entre Kòrsou i Unión Europeo trese e proyektonan prioritario di nos pais pa dilanti.

Dia 9 di aprel 2026 e delegashon di Kòrsou a partisipá na un interkambio tékniko huntu kuUlanda i representantenan di Komishon Europeo riba e tres trayektonan ku aktualmente ta kanando pa nos país: 1. e programashon teritorial a base di e di 11 Fondo Europeo di Desaroyo (EDF), e programashon regional a base di e di 11 EDF i e asina yamá MultiannualIndicative Programme 2021 – 2027 (MIP) tantu teritorial komo regional. Pa tur tres trayekto a evaluá e status aktual i a hasi palabrashonnan kon ta sigui ku kada trayekto.

Dia 11 di aprel 2026 a tuma lugá e Konferensha Ministerial di OCTA presidí pa e Presidente di OCTA, Promé Minister Mike Eman di Aruba. Durante di e konferensha aki e direktivadiario saliente a duna kuenta i rason riba su maneho administrativo i finansiero di e Asosashon i e konferensha a diskutí entre otro tokante di e rumbo nobo pa e asoshashon i tambe a dediká un seshon riba e areglo di LGO nobo kual aktualmente ta ser negoshá. Pa lo kual ta trata e futuro di OCTA diferente delegashon a subrayá e retonan finansiero di e organisashon pa kual riba término korto mester buska un solushon. Pa lo kual ta trata e areglonobo di LGO e 13 Paísnan Ultramar di Unión Europeo a firma un deklarashon pidiendoUnión Europeo pa mas tantu ku ta posibèl tene kuenta ku e temanan di prioridat pa e diestres islanan manera kambio di klima, konservashon di biodiversidat i tambe pa hasi mas fásil nanakseso na e programanan horizontal di Unión Europeo. Durante di e Konferensha Ministerialtambe a firma e Deklarashon Polítiko i e Resolushon Atministrativo. Pa lo kual ta trata e último dokumento, esaki a registrá e direktiva diario nobo di OCTA pa e periodo ku ta bini kulo konsistí di Aruba, Frans-Polynesië, Groenland i Kòrsou. E Konferensha Ministerial tambea skohe Saint Barthélemy komo e Presidente nobo di OCTA i Kòrsou komo e Vice Presidente nobo di e Asosashon. Esaki ta nifiká ku si tur kos kana manera debe ser aki un par di aña lo tene e di 23 Foro di e Paísnan Ultramar i Unión Europeo na Kòrsou.

Dia 11 di aprel 2026 pa kabamentu di atardi a tuma lugá un enkuentro entre sekretario di estado di Asuntunan di Reino, Sr. Eric van der Burg i e delegashonnan di e 6 LGO Ulandés pa asina prepará pa un enkuentro di e delegashon Ulandés, esnan di e 6 LGOnan Ulandés i e Eurocommissaris for International Partnerships, Sr. Jozef Síkela. Durante di e enkuentro aki Minister Boekhoudt a hasi un pitch riba e tema prioritario pa Kòrsou kual ta konektividatdigital.

E di 21 Foro di Unión Europeo i e Paísnan di Ultramar Europeo mes a tuma lugá dialuna, 13 di aprel. Na final di e Foro Minister Boekhoudt na nòmbèr di gobièrnu di Kòrsou a firma e programa regional di e LGO-nan Karibense dirigí riba e maneho sustenibèl di nan kapitalnatural. Su siguiente dia, esta djamars, 14 di aprel 2026, a tuma lugá e Konferensha di Invershon. E meta prinsipal di e konferensha aki tabata pa yega na proyektonan konkreto di invershon ku un karakter eksplísitamente regional pa e LGOnan den Karibe i esnan den Oceáno Pasífiko. Pa Kòrsou e 4 proyektonan konkreto ku den ko-opershon estrecho entresektor privá i gobièrnu a ser identifiká ta: 1. Blue Nap, dirigí riba ekspanshon di e konektividat entre Kòrsou, área di Latino Amérika i Karibe i Europa; 2. Establesimentu di unparke di mulina adishonal dor di Aqualectra; 3. Desaroyo di un instalashon portuaria dor di Curinde na Koningsplein; 4. Establesimentu di un sentro regional di logístika humanitario i di krisis na Kòrsou. Durante di e Konferensha di Invershon, e direktor di Blue Nap, Sr. DaniloZambala, a duna un presentashon. Mester apuntá ku e proyekto di Blue Nap ku Kòrsou a presentá ta den kompleto alineashon ku e 5 prioridatnan ku Komishon Europeo a identifiká pa área di Karibe, kualnan ta: 1. Konektividat digital; 2. Konektividat marítimo; 3. Transishonenergétiko; 4. Sargassum i. 5. Preparashon pa enfrentá e riesgo di desastèr. Kòrsou sudelegashon pa e Konferensha di Invershon tabata konsistí di entre otro representantenan di gobiérnu, Kámara di Komersio, Korpodeko i OBNA.