E di tres edishon di Kòrsou Kreativo, a tuma lugá djaweps 9 di aprel na Kaya Kaya Hub na Otrobanda. A enfoká riba e tema ‘Dikon Arte i Diseño meresé invershon real’. Tres orador a kontribuí. Artista visual Avantia Damberg, a papia tokante e balor di arte den espasio públiko; asesor di arte Sinuhe Oomen, a duna konseho pa artistanan lokal amplia nan oportunidat den merkado internashonal i Charlotte Leer di Qredits Curaçao a presentá e servisionan disponibel pa empresario. Hopi profeshonal den arte visual i diseño a asistí, mustrando gran interes. Durante e evento, Qredits a introdusí Qreative Business Academy, un programa pa fortalesé empresarionan kreativo. Dos partisipante a keda selektá pa sigui e akademia grátis, danki na koperashon ku Ministerio di Desaroyo Ekonómiko.