Bishita di delegashon di Kòrsou enkabesá pa Promé Minister Pisas na Banko Mundial na Washington

Willemstad – dia 17 di aprel último Promé Minister di Kòrsou, Sr. Gilmar Pisas, den kompania di Minister di Finansa, Sr. Charles Cooper, a bishita Banko Mundial na Washington kaminda nan a haña un presentashon di Sr. Eugene Rhuggenaath, kende ta un di e Direktornan Ehekutivo na e instituto aki ku ta representá un kantidat di pais, inkluso Hulanda.

Durante e reunion ku Sr. Rhuggenaath i un tim di profeshonalnan di Banko Mundial ku ta spesialisá riba tereno di agrikultura a papia tokante e trabou na Banko Mundial i e tipo di sosten ku e instituto aki por duna Kòrsou. Den e kuadro aki a referí na e strategia pa paisnan chikitu (Small State Strategy) ku resientemente a wòrdu lansá dor di Banko Mundial.  E strategia aki ta enfoká spesífikamente riba nesesidatnan di pais chikí. Banda di esaki, e tim di Banko Mundial a duna un presentashon na e delegashon di Kòrsou tokante un posibel proyekto tokante seguridat alimentario ku por wòrdu implementá na Kòrsou ku asistensia di Banko Mundial. Den e kuadro aki ya kaba na aña 2023 Banko Mundial a hasi un evaluashon di e nivel di seguridat alimentario na Kòrsou i a publiká un rapòrt (“Curaçao Food Security Assessment”) ku ta kontené rekomendashon importante pa subi nivel di seguridat alimentario na Kòrsou. Pues e reunion aki a identifiká spesífikamente kon Banko Mundial por asistí Kòrsou den área di agrikultura i seguridat alimentario, kual ta un di e prioridatnan di Gabinete Pisas III pa un desaroyo sostenibel di nos pais.