𝗘𝗻𝘁𝗿𝗲𝗴𝗮 𝗱𝗶 𝗯𝘂𝗸𝗶 ‘𝗞𝗮𝗻𝘁𝗶𝗸𝗮 𝗱𝗶 𝘁𝘂𝗿 𝘁𝗲𝗺𝗽𝘂, 𝗽𝗮 𝘀𝗲𝗺𝗽𝗲𝗿’ 𝗧𝗼𝗺𝗼 𝗜𝗜 𝗻𝗮 𝗚𝗲𝘇𝗮𝗴𝗵𝗲𝗯𝗯𝗲𝗿 𝗱𝗶 𝗕𝗼𝗻𝗲𝗶𝗿𝘂

Djárason, 29 di aprel 2026 Denise de Jongh-Rekwest a hasi entrega ofisial di e buki ‘Kantika di tur tempu, pa semper’ Tomo II na Gezaghebber di Boneiru, señor John Soliano.

Meta di e proyekto ‘Kantika di tur tempu, pa semper’ ta: preservá letra i melodia original di kantikanan oral folklóriko, kaminda tabata kanta hende. E kantikanan original akí ta data for di tempu di sklabitut, ademas di kantikanan ku a originá despues di segundo guera mundial. Kada un kantika tin su historia mará na dje i ta basá riba realidat. Bati e aleman ta un kantika ku a kanta ora segundo guera mundial a terminá. Su weis sí ta prosedente di tempu di sklabitut.

E kantikanan den e di dos buki akí tambe ta kantikanan tradishonal ku tabat’ei, ainda t’ei i lo t’ei pa semper, komo ku e produkshon akí ta pèrkurá pa konservá nan.

Den e buki tin e historia, letra i tambe partitura di kada kantika folklóriko.

Informadó klave pa e proyekto akí ta señora Crispina Anselma-Cicilia, mihó konosí komo yùfrou Chemmy i Engracia Coffie-Piard, mihó konosí komo Gacha.

Tambe a kòmbersá ku diferente músiko i kantante di Rincon.

Nan konosementu amplio i informashon balioso a hasi produkshon di e buki akí posibel.

Entidat Públiko Boneiru; Edukashon i Bienestar i SKAL ta na enkargo pa a produsí e buki balioso akí. Un proyekto mashá importante pa konservá kultura di Boneiru i traspaso pa futuro generashon. Denise de Jongh-Rekwest ta outor di e buki akí, publiká via su editorial Request Publishing.