Notisia04-05-2026 | 18:15

E ministerio di Asuntunan Sosial i Labor a inisiá awe ku un konsulta via internèt pa e Desishon Akohida di Mucha BES. Ku esaki gabinete ta regla e oumento di e kompensashon pa beibi pa organisashonnan pa akohida di mucha entrante promé di yanüari 2027. Tambe e adaptashon mester atendé ku mas klaridat tokante e periodo di máksimo 15 dia pa aña durante kua e organisashonnan pa akohida di mucha por ta será ku mantenshon di finansiamentu. Por reakshoná te ku promé di yüni 2026.

Oumento di kompensashon pa beibi

Organisashonnan di akohida di mucha ku ta duna akohida na beibi, ta haña supsidio èkstra di gobièrnu. Esaki yama kompensashon pa beibi. E sèn akí ta destiná pa gastunan èkstra pa beibi te ku 1 aña. Por ehèmpel pa mas personal, duna yu bòter i pèmper. Na momentu di inisio di e Lei di Akohida di Mucha BES na 2026 a drenta señalnan ku e kompensashon pa beibi tabata muchu abou. E reglanan nobo tabata trese gastunan mas haltu ku nan. Algun sentro di akohida di mucha pa beibi tabata den peliger di sera nan porta. Tabatin kaba muchu tiki lugá pa beibi. Pa e motibu ei gabinete a tuma desishon pa oumentá e kompensashon pa beibi entrente 2027. Esaki ta publiká den e revishon di e Presupuesto (Voorjaarsnota) pa 2026. Ta trata di un oumento di mas òf ménos 15% entrante 2027.

Klaridat tokante kontinuashon di pago ora e sentro di akohida ta será

E organisashonnan di akohida di mucha na Bonaire, Sint Eustatius i Saba hopi biaha ta chikitu i tin tiki personal. Esaki ta enserá ku ta bira difísil pa regla fakansi, formashon, treinen i mantenshon sin ku tin biaha ta sera e akohida. Pa e motibu akí a tuma desishon ku e organisashonnan di akohida di mucha por sera nan porta pa por máksimo 15 dia pa aña i sigui haña pago di supsidio. E organisashonnan di akohida di mucha ta na altura kaba di e manera di funshoná akí, pero awor esaki ta klaramente stipulá. Den e desishon ta stipulá eksaktamente na ki momentu e organisashonnan tin derecho riba pago di supsidio i pa kuantu tempu.

Tin algun eksepshon:

  • Un organisashon di akohida di mucha no ta risibí pago ora e supervisor ta laga sera e akohida di mucha pa motibu ku e situashon ta peligroso òf no ta saludabel pa e muchanan.
  • Ora un akohida di mucha mester sera a kousa di forsa mayor, por ehèmpel un orkan òf un otro desaster natural, no ta deskontá e dianan akí for di e 15 dianan stipulá. Den tal kaso un organisashon di akohida di mucha ta risibí supsidio pagá te ku máksimo 6 luna.

Reakshoná?

Tur hende por reakshoná di 4 di mei te ku promé di yüni 2026 (5:59 or di atardi ora lokal) riba e konsulta via internèt via: https://www.internetconsultatie.nl/besluitkinderopvangbes/b1.