Ministerio di OWCS (ESKD) ta organisá konferensia “Enseñansa & Merkado Laboral den Diálogo”

Willemstad-Riba djárason 13 di mei 2026, Ministerio di Enseñansa, Siensia, Kultura i Deporte (OWCS) ta organisá e konferensia di trabou “Enseñansa & Merkado Laboral den Diálogo” na Hotel Courtyard Marriott.

Ku e konferensia aki, minister di OWCS ta duna ehekushon na un di e puntonan prinsipal di enfoke stipulá den e programa Mehorashon di Enseñansa 2025–2028, kaminda ku e nesesidat di konekshon entre enseñansa i merkado laboral a wòrdu identifiká komo un prioridat importante. E konferensia aki ta un paso konkreto den realisashon di e meta di maneho aki dor di trese enseñansa, gobièrnu, studiante i e sektor privá i laboral huntu den un diálogo konstruktivo.

Pasikiko e konferensia aki?

For di investigashon preliminar a sali na kla ku ainda tin falta di sufisiente konosementu i komprondementu entre e diferente sektornan i gremionan na Kòrsou tokante e ekspektativanan, nesesidatnan i punto di salida di otro pa loke ta trata enseñansa i formashon. Den práktika, esaki ta kondusí innesesariamente na interpretashonnan inkorekto i un desaliñamentu entre loke enseñansa ta ofresé i loke merkado laboral ta pidi i deseá. Minister di OWCS den su maneho ta rekonosé eksistensia di e tenshon aki i ta determiná pa atendé i redusí esaki di un manera struktural i duradero.

P’esei, Ministerio di OWCS ya pa algun tempu a inisiá un trayekto riba nivel di SBO dirigí riba aktualisashon di kompetensianan kardinal basá riba e términonan final di SBO. E trayekto aki a mustra klaramente ku un kolaborashon estrecho ku e merkado laboral ta un kondishon krítiko pa yega na un mihó konekshon i komprondementu di otro su espektativa i nesesidatnan.

Ku e eskoho di un konferensia di trabou ku un base amplio, minister di OWCS ta deseá pa redusí e klof aki dor di pone tur partidonan enbolbí na mesa pa dialogá ku otro, fortalesé komprondementu mutuo i traha na un vishon komun riba enseñansa (profeshonal) i un aliñamentu mas struktural entre enseñansa i merkado laboral. Den e determinashon aki, e bos di studiantenan tambe ta forma un parti esensial di e konferensia: nan eksperensianan, ekspektativanan i perspektivanan lo ta sentral den e diálogo i lo sirbi komo input importante pa e formulashon di e maneho i práktika pa futuro.

Representashon amplio di stakeholders

E konferensia di trabou ta konta ku partisipashon di  un grupo amplio di stakeholders, inkluyendo representantenan di: instansianan gubernamental, organisashonnan di ehekutivo; instansianan di enseñansa; sektor privá i komersial; representashon di gremio industrial/komersial i sindikatonan; studiante di instansianan SBO i HBO; i otro partnernan ku ta sosial relevante.

Dor di pone e partidonan aki aktivamente den diálogo ku otro, e minister ta premirá ku por yega na un komprondementu kompartí di e desafionan i oportunidatnan, ku e meta final pa por komuniká ku otro usando e mesun lenguahe i bista komún. 

Resultadonan deseá

E konferensia di trabou ta dirigí riba realisashon di e siguiente resultadonan:

• fortalesé e konekshon entre enseñansa i merkado laboral;
• inisiá un diálogo duradero entre enseñansa, studiante i partinan di merkado laboral;
• oumentá komprondementu mutuo i bista den ekspektativanan i nesesidatnan;
• formulá akshonnan konkreto pa un mihó kolaborashon;
• promové un enfoke struktural i intersektoral riba kuestionnan di merkado laboral;
• stimulá braingain dor di un mihó konekshon entre e enseñansa i labor i desaroyo di talento.

Un momento spesial durante e konferensia lo ta e pènel ministerial parti atardi, den kual e ministernan di OWCS, SOAW, MEO i BPD lo dialogá konhuntamente saliendo for di e konteksto di nan propio ministerio i perspektiva riba nan maneho, desafionan i oportunidatnan rondó di enseñansa i merkado laboral. Aki, kada minister lo reflehá for di su propio responsabilidat polítiko i su ròl den fortalesé di manera duradero e konekshon entre enseñansa i merkado laboral.

Ku e konferensia di trabou aki, minister di OWCS no solamente ta suprayá e importansia di kolaborashon, diálogo i responsabilidat kompartí, sino e ta konfirmá tambe konkretamente su kompromiso gubernamental pa fortalesé e konekshon entre enseñansa i merkado laboral i di e forma aki promové braingain