Durante un lectura diahuebs anochi na Vrije Universiteit Amsterdam, Prome Minister di Aruba mr. Mike Eman a presenta un vision pa un Reino Hulandes cu no solamente ta basa riba structuranan constitucional of arreglonan administrativo, sino riba un ideal comparti: e Bon Comun. Segun Eman, e reto mas grandi di nos tempo ta restablece sentido di pertenencia, significado y responsabilidad comparti den comunidadnan moderno.
Den su discurso, Prome Minister a argumenta cu e institucionnan, reglamentonan y procedimentonan ta indispensabel, pero no suficiente pa mantene comunidadnan hunto. El a indica cu tanto den Europa como den otro parti di mundo occidental, tin un creciente distanciamento entre ciudadano y e institucionnan publico, un desaroyo cu ta crea desconfiansa y fragmentacion social. “Personanan no solamente kier wordo gobierna. Personanan kier sinti cu nan ta pertenece na algo mas grandi cu nan mes,” Eman a expresa durante su presentacion.
Prome Minister Mike Eman a reuni cu Hans Biesheuvel den Den Haag
Durante su bishita oficial na Hulanda, Prome Minister di Aruba mr. Mike Eman a reuni diahuebs atardi na Den Haag cu Hans Biesheuvel, un di e bosnan mas conoci den sector empresarial Hulandes y fundador di ONL (Ondernemend Nederland), organisacion cu ta representa miles di empresario na Hulanda. Biesheuvel ta conoci na Hulanda como un fuerte defensor di e spirito di un empresario y di e rol cu un empresa chikito y mediano ta hunga den fortificacion di economia y stabilidad social.
Den pasado el hunga un rol den diferente iniciativa relaciona cu innovacion, sostenibilidad y cooperacion internacional, incluyendo desarroyo den region Caribe y Aruba. Su vision riba liderazgo y economia cu ta conecta progreso economico cu bienestar social, ta coincidi cu varios di e prioridadnan cu Gabinete AVP-Futuro ta impulsando pa Aruba.
Dialogo manera esaki ta contribui na crea conexion strategico y habri porta pa cooperacion riba diferente tereno pa nos isla. Na final di e encuentro, Prome Minister a entrega na Hans Biesheuvel un moneda conmemorativo dedica na 40 aña Status Aparte y 50 aña Himno y Bandera di Aruba, como simbolo di aprecio, amistad y e relacion historico entre Aruba y Hulanda.
Prome Minister mr. Mike Eman y Minister Plenipotenciario mr. Mildred Schwengle a reuni awe na Den Haag cu Minister di Asiel y Migratie di Hulanda, Bart van den Brink. E tabata un dialogo constructivo tocante cooperacion den Reino, migracion y stabilidad regional.
Durante e encuentro, a intercambia pensamento riba e reto y oportunidad cu Reino Hulandes ta enfrenta den un mundo cu ta cambiando rapidamente.
Durante su estadia na Voco Den Haag, Prome Minister mr. Mike Eman a gradici Raymond Bridgewater y Hiram Zievinger, dos profesional den sector di horeca cu ta contribui diariamente na hospitalidad na Hulanda.
Como muestra di aprecio, Prome Minister a entrega nan un pin di bandera di Aruba y a gradici nan personalmente pa nan dedicacion y servicio. Hiram Zievinger, F&B Manager di e hotel, tin 35 aña di experiencia den horeca y awor 5 luna na Voco Hotel Den Haag. Raymond Bridgewater ta un hoben cu tin 5 aña trahando den e sector na Hulanda, ta tambe un ehempel di empeño y profesionalismo Arubiano.
Encuentronan asina ta mustra con Arubianonan y amigonan di Aruba den exterior ta sigui representa e balornan di hospitalidad, respet y trabou duro.
KOMPARTI E NOTISIA AKI VIA / Share the news
Related
639114718427035"
639114718427035"
