Minister Boekhoudt ta bishitá Clínica Colsanitas na Bogotá

Bogotá, Colombia – 4 yüni – Riba e di dos dia di su bishita di trabou na Colombia, Minister di GMN Tyron Boekhoudt, huntu ku representantenan di SVB i e delegashon di Kòrsou, a bishitá Clínica Colsanitas, parti di e Grupo Keralty, un di e organisashonnan di salú integra mas grandi den nos region.

E bishita ta forma parti di e esfuersonan di Minister Boekhoudt ii SVB pa bini solushonnan konkreto pa e  listanan di espera pa kuido largu ku Kòrsou ta enfrentando aktualmente den kuido spesialisá. Durante e reunionnan, a deliberá tokante diferente posibilidatnan di kolaborashon entre Kòrsou i Colombia, esaki ta inklui interkambio di konosementu, sosten di spesialistanan médiko i otro inisiativanan ku por kontribuí na un akseso mas rápido i mas mihó na kuido spesialisá pa nos pashèntnan.

E delegashon a risibí presentashonnan tokante e modelo di kuido di Colsanitas, e organisashon di kuido di kalidat haltu, inovashon digital, kontrol di kalidat i e manera ku diferente disiplinanan médiko ta traha hunto den un ret integrá. Atenshon spesial a bai pa e modelo di kuido ku ta drai rondo di ‘e hende’ ku e organisashon ta apliká.

Tambe a interkambiá eksperensianan tokante e diferente retonan ku sistemanan di salú ta enfrentá na nivel mundial, manera e kresementu den demanda pa kuido spesialisá, falta di personal i e nesesidat pa mantené kuido aksesibel, di kalidat i pagabel.

E bishita na Clínica Colsanitas ta forma parti di un mishon mas amplio di e delegashon di Kòrsou na Colombia, ku ta enfoká riba identifiká solushonnan konkreto pa e listanan di espera den kuido spesialisá. Den e kuadro aki, ta eksplorá oportunidatnan di kolaborashon ku institushonnan di salú na Colombia, interkambio di konosementu i e posibilidat di mobilisá ekspertisio médiko ku por yuda mehorá akseso na kuido pa nos hendenan.