UN SOÑO, UN VISHON: ku amor pa e futuro di nos Kòrsou

Vishon pa futuro di Kòrsou a ser lansá

Willemstad – E futuro di Kòrsou ta kuminsá ku un soño. Un soño tokante kon nos ke biba, traha, siña i biba huntu riba nos isla. For di e pensamentu aki a lansa UN SOÑO, UN VISHON: ku amor pa e futuro di NOS Kòrsou. Un kampaña nashonal di partisipashon, UN KÒRSOU, ku ta invitá habitantenan pa kontribuí aktivamente ku nan ideanan riba e futuro di Kòrsou.

Un pregunta importante ta sentral:  Kiko ta bo soño pa Kòrsou?

UN SOÑO, UN VISHON ta parti di e trayekto nashonal pa desaroyo di un vishon a largo plaso‘UN KÒRSOU’ pa Kòrsou. E trayekto aki ta ser ehekutá bou di enkargo di Ministerio di Asuntunan General na nòmber di Gobièrnu di Kòrsou. Den e enkargo aki, Stichting Overheidsaccountantsbureau (SOAB) ta karga ku e responsabilidat final na nòmber di  minister di Asuntunan General. SOAB a kontratá Strategic Results & Development Institute (SRDI) pa ehekutá i guia e proseso di partisipashon.

E meta final ta pa desaroyá un vishon di futuro ku komunidat ta sostené ampliamente i ku ta guia e rumbo pa desaroyo di Kòrsou den e próksimo dekadanan. Un vishon ku no solamente ta guia maneho i desaroyo, sino ku prinsipalmente ta sali for di e soñonan, balornan, ambishonnan i eksperensianan di e hendenan ku ta forma Kòrsou tur dia.

Di preparashon pa partisipashon
E lansamentu di UNKORSOU.COM ta marka un fase nobo i importante den e trayekto di vishon pa futuro di Kòrsou. For di e promé evento na desèmber, a hiba kombersashonnan ku representantenan di gobièrnu, sektor empresarial i organisashonnan sosial. Tambe a organisá gruponan di enfoke ku miembronan di e diáspora di Kòrsou na Hulanda i ku diferente gruponan den komunidat na Kòrsou. Ademas, a analisá investigashonnan relevante, dokumentonan di maneho i desaroyonan sosial pa identifiká e oportunidatnan i retonan prinsipal pa futuro di e isla. E fase preparatorio aki a pone un fundeshi fuerte. Awor a yega e momentu pa amplia e diálogo i invitá henter Kòrsou pa pensa i traha huntu na un vishon di futuro kompartí.

Konstruyendo e futuro huntu
Kòrsou ta enfrentá retonan sosial, ekonómiko i di komunidat importante. Na mes momentu, e isla tin un gran fortalesa: e konosementu, kreatividat, resiliensia i kompromiso di su hendenan. Un vishon di futuro ta haña nifikashon berdadero solamente ora hende por rekonosé nan mes den dje. P’esei, den ‘UN SOÑO, UN VISHON’ un prinsipio ta sentral: Huntu nos ta krea e futuro di Kòrsou.

Pa medio di enkuesta, gruponan di enfoke, bishita na skolnan, kombersashonnan, eventonan i plataforma digital, habitantenan ta haña e oportunidat pa kontribuí aktivamente na e Kòrsou di mañan. Un invitashon ta bai na hóbennan i mayornan, empresarionan, studiantenan, profeshonalnan, organisashonnan sosial, komunidatnan di bario i tambe miembronan di e diáspora pa kompartí nan ideanan, eksperensianan i soñonan. Pasombra e futuro di Kòrsou por ser formá solamente ora ku skucha mas opinion ku ta posibel.

Partisipashon
Den lunanan di yüni i yüli ‘UN KÒRSOU’ lo ta presente na diferente aktividat di futbol, manera ‘watch parties’. Ademas, lo lansa un programa amplio di partisipashon ‘online’ pa alkansá mas tantu hende ku ta posibel. Sea ku bo a nase na Kòrsou, ta biba òf traha aki, òf for di eksterior i bo ta sinti un vínkulo fuerte ku e isla:

Bo bos ta konta.
Bo ideanan ta konta.
Bo soño ta konta.

Kompartí bo bos. Kompartí bo soño. Yuda konstruí e futuro di Kòrsou.

E futuro di Kòrsou no ta ser determiná pa un persona, un organisashon òf un generashon.
E futuro di Kòrsou ta ser formá pa nos tur.
UN SOÑO, UN VISHON: ku amor pa e futuro di NOS Kòrsou.

Pa mas informashon i partisipashon: www.unkorsou.com

Sigui tambe e kanalnan sosial di UN KÒRSOU pa aktualisashonnan, aktividatnan i oportunidatnan pa partisipá.

Facebook:  https://www.facebook.com/profile.php?id=61590621952786
IG: www.instagram.com/unkorsou
YT: www.youtube.com/@UNKÒRSOU
LinkedIn: https://www.linkedin.com/company/un-k%C3%B2rsou