Parlamentario Monte ta yega na un solushon struktural pa fruta, berdura i komestibelnan na preis mas pagabel pa pueblo.

Parlamentario Monte ta yega na un solushon struktural pa fruta, berdura i komestibelnan na preis mas pagabel pa pueblo

WILLEMSTAD – Kòrsou ta den un momento importante den e lucha kontra e haltu kosto di bida. Parlamentario di frakshon MFK, Ishahier Monte, a tuma e inisiativa pa buska solushonnan struktural ku por duna alivio na saku di e konsumidó, spesialmente den e area di fruta, berdura i otro komestibelnan esensial pa uso diario.

Na fin di siman pasa, Parlamentario Monte a tene un reunion virtual ku dos komersiante di Kòrsou i dos komersiante di Latinoamérica, spesífikamente di Colombia. Durante e reunion, a ser discutí e situashon di e haltu preisnan ku pueblo di Kòrsou ta enfrentá, asina tambe e faktornan geopolitiko mundial ku ta influenshá e kosto di produkto alimentario na diferente paisnan.

Komo resultado di e reunionnan aki, a logra un akuerdo importante pa importá fruta, berdura, komestibel i otro produkto for di Colombia i Republika Dominikano na preisnan mas aksesibel pa pueblo di Kòrsou. E meta ta pa kreá un modelo mas sostenibel ku lo kontribuí na baha e kosto di bida i oumentá e disponibilidat di produkto fresku i di bon kalidat.
Ademas, den kuadro di su proyekto sosial “Ban Duna un Man na Bo Ruman”, Parlamentario Monte a logra un otro akuerdo importante. Aktualmente e proyekto ta repartí 250 pakete di kuminda mensualmente na famianan ku tin nesesidat. E meta awor ta pa dobel e kantidat aki i yega na 500 pakete di kuminda pa luna, permitiendo ku mas famianan por benefisiá di e sosten aki.

Parlamentario Monte ta indiká ku e inisiativa aki ta forma parti di un plan mas amplio ku eventualmente mester resultá den e realisashon di un “Marshe pa Pueblo”, un konsepto dirigi riba garantisá ku produkto básiko por yega na e konsumidó na preisnan mas hustu i pagabel.

“Mi ta kere ku pueblo meresé solushonnan konkretu. Nos no por sigui wak e kosto di bida subi sin buska alternativenan ku por duna alivio real na nos famianan, penshonadonan i trahadónan. Esaki ta un proseso ku ya a kuminsá i mi lo sigui hasi tur loke ta posibel pa logra ku e proyektonan aki bira un realidat,” asina Parlamentario Monte a deklará.

Den e spiritu di Blue Wave, Monte ta sigui enfoká riba solushonnan ku por mehorá e kalidat di bida di pueblo, atendiendo e desafionan sosial, ekonómiko i mental ku hopi hende ta enfrentá awe.
Parlamentario Monte a enfatizá ku e meta ta pa kulminá e proseso aki den tal forma ku pa aña 2027 Kòrsou por konta ku un proyekto sólido i duradero ku lo benefisiá pueblo den un manera struktural.