Kòrsou mester di un Gezaghebber? 

Willemstad – E pregunta aki ta base di un karta ku Omar Gill a dirigí na Parlamento di  Kòrsou. No komo nostalgia pa pasado ni komo un atake riba niun mandatario, pero  komo un yamada pa Parlamento tene e kurashi pa evaluá si e modelo aktual ta sirbi  nos isla manera deseá. 

Banda di krímen internashonal, riba nivel lokal kiebro den kasnan, atrakonan i  hòrtamentu di outo, ta kousa ku hopi famia no ta sinti nan mes mas sigur. Hopi famia ta  lanta muraya haltu i ta tuma diferente medida pa protehá nan hogar i famia. Bo no por  laga outo dilanti kas mas paso ta pasa kita porta bai kuné. Tambe nos ta mira kon ta tira  sushi riba kaya i den bario nan sin eskrúpulo. Kasi diariamente prensa ta publiká loke e  malechornan ta okashoná i tambe e preokupashonnan ku ta reina. 

Pueblo ta puntra: Ken ta wak pa nos? Ken ta hasi supervishon i kontrol riba órden  públiko? 

For di 1951 te ku 10-10-10, Kòrsou tabatin e funshon di Gezaghebber. Personanan  manera Ornelio “Kid” Martina (QEPD), Elmer “Kadè” Wilsoe, Stanley Betrian i Lizanne  Dindial a okupá e funshon aki i aktua ku man duru tin biaha. E Gezaghebber no tabata  solamente un figura atministrativo komo presidente di Bestuurscollege. E tabata tambe  tin responsabilidat pa órden públiko, seguridat i mantenementu di lei i órden. 

Segun Gill “E tipo di liderazgo visibel, koordinashon i kapasidat di aktua mesora ta hasi  falta den e situashon aktual”. 

Gill no ta proponé pa regresá simplemente na pasado. Tempu a kambia. Pero pueblo  tin derecho pa eksigí ku nos sistema di gobernashon wòrdu evaluá i ahustá ora e  realidat ta pidi esaki. Si nos tin kurashi pa kuestioná loke no ta funshoná, nos mester  tambe tin kurashi pa puntra: Tin algun elemento di e modelo anterior ku ainda por sirbi  nos pueblo awe? 

E struktura nobo kaminda a bin ku funshonnan nobo manera Sekretario General i  Direktor di Sektor, ta duna e resultado ku pueblo a spera? Ántes bo por a mira e  Gezaghebber ta presentá riba e lugá di un insidente, atendiendo loke ta pasando i  dunando instrukshon mesora. 

Gill su karta ta pidi Parlamento pa evaluá e pregunta aki den un manera serio i  ophetivo. No pa mustra dede, pero pa habri un diskushon ku pueblo ta meresé: Kon  nos por fortifiká órden públiko, subi visibilidat di gobernashon i mehorá kalidat di bida.

“Solamente asina por baha e sentimentu di inseguridat,” sigun Gill. Ademas e ta sòru  pa minimalisá e impakto negativo ku por afektá e sektor di turismo.  

E pregunta mas importante ta: “Parlamento ta dispuesto pa pensa diferente pa logra  mihó resultado, pa nos pueblo, nos ekonomia I nos pan di kada dia? 

Gill ta finalisá: 

“Mi no ta spera ku Parlamento a frusa den e modelo di 10-10-10 i ku si lo tuma mi  proposishon na konsiderashon”.