Promé Minister Pisas ta sinta ku CUSAR pa fortalesé preparashon nashonal

WILLEMSTAD – Promé Minister Gilmar Pisas ta sigui duna prioridat na fortalesé e preparashon nashonal pa situashonnan di krísis i kalamidat. Despues ku ayera Promé Minister Pisas a kontestá preguntanan den Parlamento tokante e temblornan fuerte ku a tuma lugá na Venezuela, awe, djabièrnè 10 di yüli 2026, Promé Minister Pisas a bishitá Sentro di kordinashon operashonal di krísis i desaster (COC3) na Rio Canario pa un reunion di trabou ku representantenan di Caribbean Urban Search and Rescue Foundation (CUSAR).

Den e reunion tambe tabata presente señor Lesley Fer, direktor di direktorado ‘Risicobeheersing en Rampenbeleid’ (DRR) i Kordinadó Nashonal di Krísis, huntu ku señor Oleana, komandante suplente di Brantwèr Kòrsou.

Durante e enkuentro, e tim di CUSAR, ku a partisipá den e mishon di asistensia na Venezuela, a kompartí nan eksperiensianan. Nan a splika e proseso ku nan a sigui pa yega na e área afektá i e diferente reto i eksperiensianan ku nan a enfrentá durante e operashon di reskate.

Promé Minister Pisas a ekspresá su apresio profundo pa e dedikashon, profeshonalismo i balentia ku e tim a mustra den representashon di Kòrsou. Gobièrnu ta sumamente orguyoso di e kontribushon ku nan a hasi den e mishon humanitario aki.

Durante e reunion tambe a keda kla ku CUSAR ta habrí pa fortalesé su kolaborashon ku Gobièrnu di Kòrsou. Dor ku nan ta disponé di hopi konosementu spesialisá den maneho di krísis, buska i reskate, i asistensia den kalamidatnan, e kooperashon aki lo kontribuí na sigui fortalesé e preparashon di nos pais pa eventual situashonnan di emergensia.

Gobièrnu di Kòrsou ta sigui invertí den preparashon, kordinashon i kooperashon ku e diferente organisashonnan relevante, pa asina protehá nos komunidat i garantisá ku Kòrsou ta mihó prepará pa enfrentá eventual desafionan den futuro.