Kasino online  

Ku e relato di prensa aki parlamentario Silvania kier duna un kontribushon konstruktivo  pa solushona problema di Pais i yena kaha di gobiernu. Pa asina por subi penshon di  behes na Cg 1.500 pa luna.  

Na 1993 Suzy Romer komo minister di Hustisia a firma e Landsverordening op de  Buitengaatse Hazardspelen (LBH). E lei aki a permití pa 4 famia bira master license  holder. E 4 famianan aki a duna sub lisensia na mas ku 800 kasino online rònt mundu.  E kasinonan online tabata paga e 4 famianan aki pa e sub lisensia. E pago aki ta bai  den saku di e master license holder. Gobièrnu di Kòrsou no tabata risibí ningun depchi  di e sub lisensia. Ront mundu ta un entidat di gobièrnu ta duna lisensia i kobra  anualmente pa esaki. E pago di lisensia ta bai direktamente den kaha di gobièrnu di  e pais ku a duna lisensia. Danki na Suzy Romer Kòrsou ta e úniko pais ku 30 aña  largu a laga dunamentu di lisensia den mannan priva. E akto aki a perhudiká kaha di  gobièrnu pa miónes. Gobiernunan di PAR i MAN nunka a kambia e lei aki.  

Ku otro palabra for di 1993 kasino online ta establesé legalmente na Kòrsou. For di  dia ku e lei di Suzy Romer a drenta na vigor kasino online tabata operá sin kontrol  dirèkt di gobièrnu, òf Gaming Control Board (GCB). Miéntras ku leinan pa evitá  labamentu di plaka no ta kubri e industria di online gaming sufisientemente.  Histórikamente, reputashon di Kòrsou relashoná ku kombatimentu di labamentu di  plaka i kombatimentu di finansiamentu di terorismo ta malu. Fo’i 1993 Kòrsou hopi  biaha a wòrdu mirá rònt mundu komo un sentro di aktividatnan kriminal i labamentu di  plaka, kontribuyendo na un imágen negativo pa nos pais.  

Danki na esfuerso di minister Javier Silvania e lei di Suzy Romer a wòrdu revoká i  remplasá pa Landsverorderning op Kansspelen (e asina yama: LOK). Curaçao  Gaming Authority (ántes GCB) awor ta duna lisensia i manda e faktura pa e operador  di e kasino online paga. Ontvanger mester sòru kobra e sèn di lisensia. LOK a drenta  na vigor na 2024. E tempu ei den un par di luna gobièrnu a risibí mas ku Cg 14 mion  na lisensia. Lo ta bon pa minister Cooper informá pueblo di Kòrsou kuantu sèn  gobièrnu a risibí den 2025 i 2026 na lisensia di kasino online. Den 2021 kasino online  a kontribuí ku $ 1,2 miar esta 17,6 % di e produkto bruto interno di Isle of Man.  

Kasino online ta e galiña ku ta pone webu di oro pa kaha di gobièrnu rond mundu.  Den programa di gobernashon di Pisas 3 ta pone ku gobièrnu kier subi penshon di  behes. Na Kòrsou tin mas of ménos 40.000 penshonado ku ta kobra AOV so. Pa por  hasi penshon di behes Cg 1.500 pa luna gobièrnu mester Cg 240 mion (40.000 x 500  x 12) pa aña. Si minister Cooper sòru solushoná e problemanan ku tin. Online gaming  por generá sufisiente entrada pa gobièrnu por subi penshon di behes na Cg 1.500 pa  nos grandinan. Den e komunikado aki nos ta menshoná un punto ku mester atenshon  urgente di minister Cooper.  

Kuenta di banko  

E kasino online ku haña lisensia di Kòrsou mester ta un kompania lokal. E kasino  online ta wòrdu inskribí na Kámara di Komersio. Den LOK ta pone ku e kompania  mester tin un kantor na Kòrsou. E kompania mester tuma hende lokal pa okupá  funshonnan klave manera compliance officer den e kompania. E kasino online mester  paga belasting na Kòrsou manera tur otro kompania. Lamentablemente bankonan  lokal no ta permití pa un kasino online por habri un kuenta na Kòrsou. Esei ta hasi  hopi difísil pa un kasino online por paga lisensia i belasting riba kuenta di ontvanger  na un banko lokal. Ta p’esei gobièrnu di Kòrsou temporalmente tin un kuenta den  estranhero pa por fasilitá e pago di lisensia i belasting.  

Ántes bankonan lokal a konsiderá e sektor di online gaming un sektor di altu riesgo  pasobra GCB no tabata hasi supervishon pa evitá labamentu di plaka i otro  aktividatnan ilisito.  

For di dia ku LOK a drenta na vigor Curaçao Gaming Authority (CGA) tin tur e  hèrmèntnan pa supervisá e sektor. Parlamentario Silvania ta pidi minister Cooper pa  e sinta na mesa ku Asosashon di Bankeronan, CGA i CBCS pa wak e posibilidat pa  kasinonan online por haña un kuenta di banko na Kòrsou meskos ku minister Cooper  a regla pa riferonan i nan trahadó por tin un kuenta di banko.  

Atentamente,  

Mr.drs. Javier Silvania,  

Parlamentario pa  

frakshon di MFK